'अहिल्यादेवींना फक्त लोकमाता किंवा पुण्यश्लोक म्हणा'

पुण्यश्लोक अहिल्यादेवी होळकर यांच्या जयंतीदिनी चौंडी येथे एका कार्यक्रमासाठी राष्ट्रवादीचे नेते शरद पवार आणि आमदार रोहित पवार उपस्थित होते. या आयोजित कार्यक्रमासाठी भाजप आमदार गोपीचंद पडळकर यांना पोलिसांनी रोखलं होतं. आम्हाला रोखण्याचं षडयंत्र शरद पवारांचे असल्याचा आरोप पडळकरांनी केला होता. दरम्यान, पवारांनी जातीय तेढ निर्माण केल्याच्या आरोपावरून आमदार पडळकरांविरोधात गुन्हा दाखल करण्यात आला आहे. (ahmadnagar political News)

आता आणखी एक बातमी समोर येत आहे. ३१ मे रोजी चौंडीतील कार्यक्रमातील माजी आमदार अनिल गोंटे (Anil Gote) यांच्या भाषणावर आक्षेप घेण्यात आला आहे. गोंटे यांनी भाषणात राजमाता आणि महाराणींचा अवमान केल्याचा आरोप करण्यात येत आहे. याचा निषेध करण्यासाठी आज दुपारी जामखेड येथील खर्डा चौकात अहिल्याप्रेमी आणि शिवप्रेमींच्या वतीने निदर्शने करण्यात येणार आहेत.

या घटनेमुळे राजकारण आणखी गरम होण्याची शक्यता वर्तवली जात आहे. तर भाजपा तर्फे गोंटे यांच्या वक्तव्याचा निषेध करण्यात आला आहे. ‘राजमाता हे विशेषण महाराष्ट्रातील ठराविकच महान स्त्रियांना लावले जाते. गोंटे यांच्या या वक्तव्याने त्यांचा अवमान होत आहे, असं भाजपचे जिल्हा सरचिटणीस सचिन पोटरे यांनी म्हणाले आहेत. भाजपच्या वतीने गोटे व कार्यक्रम संयोजकांचा जाहीर निषेध करण्यात येत आहे.

कार्यक्रदरम्यान, भाषण करत असताना सुरुवातीलाच अहिल्यादेवींचा उल्लेख राजमाता किंवा महाराणी असा न करता पुण्यश्लोक असा करावा, अशी सूचना मांडली. मात्र, ही सूचना करताना त्यांची जीभ घसरली. अहिल्यादेवींना फक्त लोकमाता किंवा पुण्यश्लोक म्हणा. त्यांना राजमाता किंवा महाराणी म्हणू नका, असं बोलून तुम्ही त्यांचा अपमान करताय. राजामाता पायलीच्या पन्नास पडल्या आहेत आणि महाराणी फुटाफुटावर आहेत, असे वक्तव्य त्यांनी केले.

दरम्यान, आता गोंटे यांच्या भाषणातील हा मुद्दा आता गाजू लागला आहे. माजी आमदार गोंटे यांनी केलेल्या या आक्षेपार्ह वक्तव्याचा निषेध करण्यासाठी आद दुपारी ३ वाजता जामखेडमधील खर्डा चौकात निदर्शने करण्यात येणार आहेत. यासाठी अहिल्याप्रेमी आणि शिवप्रेमींनी एकत्र यावे, असे आवाहन करण्यात येत आहे. तेथून जामखेड तहसिलदार कार्यालयात जाऊन गोंटे यांच्या वक्तव्याचा निषेध नोंदविण्यात येणार आहे.