Eknath Shinde : CM शिंदे हेलिकॉप्टरने साताऱ्याकडे रवाना झाले, पण मध्येच असं नेमकं काय घडलं की त्यांना..

सातारा : मुंबईहून आपल्या दरे (महाबळेश्वर) गावाकडे दोन दिवस मुक्कामी निघालेले मुख्यमंत्री एकनाथ शिंदे (Eknath Shinde) यांचे हेलिकॉप्टर (Helicopter) खराब झाल्यामुळे पुन्हा राजभवन हेलिपॅडवर तातडीने उतरविण्यात आले. त्यानंतर दुसऱ्या हेलिकॉप्टरने ते दरे गावाकडे निघाले.

मात्र, महाबळेश्वर परिसरात पाऊस असल्याने हवामान खराब झाल्याने ते साताऱ्यातील सैनिक स्कूलच्या हेलिपॅडवर उतरले. येथे पालकमंत्री शंभूराज देसाई (Shambhuraj Desai) यांनी त्यांचे स्वागत केले. अल्प वेळ शासकीय विश्रामगृहात थांबून शासकीय वाहनाने ते दरेकडे रवाना झाले.

मुख्यमंत्री शिंदे दोन दिवस आपल्या दरे या मूळगावी मुक्कामी येणार होते. यासाठी सकाळी राजभवन येथून हेलिकॉप्टरने टेक ऑप केला. साधारण २० मिनिटांतच त्यांच्या हेलिकॉप्टर खराब झाल्याने पुन्हा तातडीने राजभवन हेलिपॅडवर उतरविण्यात आले.

त्यानंतर दुसऱ्या हेलिकॉप्टरने मुख्यमंत्री शिंदे हे साताऱ्याकडे रवाना झाले; पण महाबळेश्वर परिसरात पाऊस पडत असल्याने हवामान खराब झाले होते. त्यामुळे त्यांचे हेलिकॉप्टर साताऱ्याला आणण्यात आले. येथील सैनिक स्कूलच्या हेलिपॅडवर उतरविण्यात आले.

मुख्यमंत्री साताऱ्यात येणार असल्याचे समजताच पालकमंत्री देसाई, आमदार मकरंद पाटील, जिल्हाधिकारी जितेंद्र डुडी, पोलिस अधीक्षक समीर शेख, निवासी उपजिल्हाधिकारी प्रशांत आवटे यांच्यासह अधिकारी हेलिपॅडवर उपस्थित राहिले. मुख्यमंत्र्यांच्या पुढील प्रवासासाठी वाहनांचा ताफाही तैनात ठेवला.

हेलिपॅडवर आगमन होताच पालकमंत्री देसाई यांनी त्यांचे स्वागत केले. या वेळी पोलिस दलाच्या वतीने मानवंदनाही देण्यात आली. त्यानंतर मुख्यमंत्री शिंदे अल्पवेळ शासकीय विश्रामगृहात थांबले. येथे अधिकाऱ्यांसोबत चर्चा करून त्यांनी काही सूचना केल्या. तेथून ते शासकीय वाहनाने दरे गावाकडे रवाना झाले.