Ajit Pawar: दादा vs दादा; चंद्रकांत पाटलांनी अजित पवारांची केली मुख्यमंत्र्यांकडे तक्रार, नेमकं काय घडलं?

उपमुख्यमंत्री अजित पवार आणि पुण्याचे पालकमंत्री चंद्रकांत पाटील यांच्यामध्ये निधीवरून कोल्ड वॉर रंगल्याच्या चर्चा सध्या राजकीय वर्तुळात सुरू आहेत. 400 कोटी रुपयांच्या विकासकामांना निधी मिळाला नसल्याची तक्रार पुण्याचे पालकमंत्री चंद्रकांत पाटील यांनी थेट मुख्यमंत्री एकनाथ शिंदे यांच्याकडे केल्याची माहिती आहे.

पुण्यात मे महिन्यामध्ये जिल्हा नियोजन समितीची बैठक पार पडली होती. या बैठकीमध्ये ४०० कोटी रुपयांच्या विकासकामांना मंजुरी दिली होती. परंतु तीन महिन्यांनंतरही अर्थखात्याकडून त्याला अद्याप मंजुरी नाही. अजित पवार राज्याच्या सत्तेत सहभागी होण्यापूर्वी जिल्हा नियोजन समितीची ही बैठक झाली होती. यामुळे पालकमंत्री चंद्रकांत पाटील यांनी थेट मुख्यमंत्री एकनाथ शिंदे यांच्याकडे तक्रार केल्याची माहिती आहे.

जिल्हा नियोजन समितीच्या बैठकीचे इतिवृत्त १ जुलै रोजी तयार झाले आहे. त्यानंतर ते प्रशासनाकडे मंजुरीसाठी पाठवले होते. मात्र, २ जुलै रोजी अजित पवार यांनी उपमुख्यमंत्रीपदाची शपथ घेतली. त्यानंतर इतिवृत्त मंजुरीअभावी रखडले आहे. अजित पवार आणि चंद्रकांत पाटील यांच्यातील कोल्डवॉरचा हा परिणाम असल्याची चर्चा आहे.

दरम्यान, अजित पवार यांनी मंत्री पदाची शपथ घेतल्यानंतर पुण्याच्या पालकमंत्री पदावर अजित पवार यांची नियुक्ती होणार, अशी चर्चा काही दिवसांपासून सुरू आहे. दुसरीकडे या पदावर चंद्रकांत पाटील हेच कायम राहावे, यासाठी भाजपचे काही नेते आग्रही आहेत. तर पुण्याचे पालकमंत्रीपद मिळेपर्यंत कोणत्याही कारभारात ढवळाढवळ करणार नाही, अशी अजितदादांची भूमिका होती.

पुण्यातील प्रलंबित विकासकामांना निधी मिळत नाही, असं चंद्रकांत पाटील यांचं म्हणणं आहे. अजित पवार यांच्या दबावामुळेच ती रखडल्याची तक्रार भाजपच्या गोटातून करण्यात येत आहे. दरम्यान, याबाबत मुख्यमंत्री एकनाथ शिंदे यांच्याकडे तक्रार करताच मुख्यमंत्र्यांनीही तातडीने जिल्हाधिकाऱ्यांशी संपर्क साधत त्यांना धारेवर धरल्याची चर्चा आहे. यासंबधीचे वृत्त 'साम टिव्ही'ने दिले आहे.