२३०५ मतदान केंद्रांवर जिल्हाधिकाऱ्यांचे लक्ष! सीसीटीव्हीतून मतदारांच्या रांगांवर नियंत्रण; सायंकाळी सहापूर्वी रांगेत उभारलेल्यांना बजावता येईल मतदानाचा हक्क

सोलापूर : जिल्ह्यातील ११ विधानसभा मतदारसंघातील तीन हजार ७३८ मतदान केंद्रावर आज सकाळी ७ वाजल्यापासून मतदानाची प्रक्रिया सुरू झाली आहे. त्यातील दोन हजार ३०५ मतदान केंद्रावर वेब कास्टिंगची यंत्रणा कार्यान्वित करण्यात आली आहे. सोलापूर शहरातील सर्वच मतदान केंद्रांवर ही यंत्रणा लावली आहे. जिल्हाधिकारी कुमार आशीर्वाद हे नियोजन भवन येथील सभागृहात लावलेल्या मोठ्या स्क्रिनवरून त्या केंद्रांवरील मतदारांच्या रांगा, अडचणी व मतदान सुरळीत होत असल्याची पाहणी करत आहेत.

जिल्ह्यात आतापर्यंत मतदान प्रक्रिया सुरळीत सुरु असून कोणत्याही ठिकाणी अनुचित प्रकार घडलेला नाही. प्रत्येक मतदारसंघात पोलिसांचा मोठा बंदोबस्त लावण्यात आला असून पोलिस प्रमुखांच्याही भेटी सुरु आहेत. पोलिसांनी अनेक केंद्र परिसरात स्वतंत्र सीसीटीव्ही कॅमेरे लावले असून काही ठिकाणी ड्रोनचा वापर देखील केला जात आहे. संशयास्पद हालचाल आढळल्यानंतर तत्काळ त्याठिकाणी पोलिसांचा फौजफाटा पाठविला जात आहे. अनेक मतदान केंद्रांवर रांगा असून काही ठिकाणी मतदान केंद्रावर गर्दीच नसल्याचे चित्र आहे. शहराच्या तुलनेत ग्रामीण भागात मतदानाचा टक्का अधिक असल्याची सद्य:स्थिती आहे.

सायंकाळी सहापूर्वी रांगेत उभारलेल्यांनाच मतदान करता येईल

विधानसभा निवडणुकीसाठी मतदान करण्याची वेळ सहा वाजता संपणार आहे. त्यानंतर आलेल्या मतदारांना मतदान करता येत नाही. पण, सहा वाजण्यापूर्वी मतदार रांगेतील सर्व मतदारांना मतदान करता येते. त्या सर्वांचे मतदान पूर्ण होईपर्यंत तेथील प्रक्रिया सुरुच राहील. दुपारी दोन वाजेपर्यंत जिल्ह्यातील मतदानाची एकूण टक्केवारी ४० टक्क्यांवर पोचली आहे.