राष्ट्रीय राजकारणात उलथापालथ! काँग्रेसला पवारांवर विश्वास नाही? आता नितीशकुमारांची एन्ट्री...

अदानी प्रकरणावर राष्ट्रवादीचे अध्यक्ष शरद पवार यांनी घेतलेल्या महाविकास आघाडीत नाराजी आहे. काँग्रेसचे वरिष्ठ नेते देखील नाराज आहेत. त्यामुळे युपीएमध्ये शरद पवार यांना बाजूला करण्याची तयारी सुरू झाल्याची चर्चा राजकीय वर्तुळात रंगली आहे. कारण आगामी लोकसभा निवडणुकीत प्रादेशिक पक्षांना एकत्र करण्याची जबाबदारी नितीशकुमार यांच्याकडे देण्यात आली आहे. आधी ही जबाबदारी शरद पवार यांच्याकडे असायची. शरद पवारांनी हाक देली तर विरोधक एकत्र यायचे मात्र आता नितीशकुमार यांना ही जबाबदारी देण्यात आली आहे.

काँग्रेसचा आता शरद पवारांवर विश्वास राहिलेला नाही, अशी चर्चा देखील होत आहे. शरद पवार यांच्या उपस्थितीत यूपीएच्या निवडणुकीच्या रणनीतीवर चर्चा झाली तर ही माहिती भाजपला मिू फुटू शकते, अशी भीती काँग्रेसला असल्याची माहिती इंडिया टिव्हीने सुत्रांच्या हवाल्याने दिली आहे.

शरद पवार निश्चितपणे यूपीएचा भाग राहतील. पण महत्त्वाच्या धोरणात्मक चर्चेत त्यांचा समावेश होणार नाही, असा निर्णय काँग्रेसने घेतल्याची चर्चा आहे. नितीशकुमार हे सर्व प्रादेशिक पक्षांमधील समन्वयक म्हणून काम पाहतील. नितीशकुमार हे अनुभवी नेते आहेत, त्यांचे सर्व प्रादेशिक पक्षांशी चांगले संबंध आहेत. त्यांच्या अनुभवाचा फायदा काँग्रेसला यूपीएसाठी घ्यायचा आहे.

या चर्चेच्या पार्श्वभूमीवर शरद पवार आज (गुरूवार) दिल्ली दौऱ्यावर गेले आहेत. शरद पवार दिल्लीत काँग्रेस अध्यक्ष मल्लिकार्जुन खरगे आणि राहुल गांधी यांना भेटणार आहेत.

काँग्रेसचे ज्येष्ठ नेते केसी वेणुगोपाल स्वतः मुंबईत येऊन उद्धव ठाकरेंशी चर्चा करणार आहेत. नितीशकुमार यांची समन्वयक म्हणून नियुक्ती करून काँग्रेसने राष्ट्रवादीला संदेश दिल्याची चर्चा आहे. शरद पवार हे देशातील सर्वात मोठे नेते आहेत आणि ते सर्व प्रादेशिक पक्षांना एकत्र आणण्याचे काम करू शकतात. मात्र काँग्रेसने ही जबाबदारी नितिशकुमारांना दिली आहे.

शरद पवार विरोधकांचे महत्त्वाचे मुद्दे फेटाळून लावत असल्यामुळे भाजपला फायदा होत असल्याचे काँग्रसचे म्हणणे आहे. त्यामुळे राहुल गांधी देखील नाराज असल्याचे बोलले जात आहे.