पतीचे अधुरे स्वप्न पूर्ण करणार; काॅंग्रेसच्या जयश्री जाधवांची भूमिका

कोल्हापूर: स्वर्गीय आमदार चंद्रकांत जाधव (Chandrakant Jadhav) यांची कोल्हापूरच्या विकासासाठी काही स्वप्ने होती. ती पूर्ण करण्यासाठी मी निवडणूकीच्या रिंगणात उतरले आहे. त्यांना विकासाच्या अनेक गोष्टी करायच्या होत्या त्या मी आगामी काळात पूर्ण करणार असल्याचे काॅग्रेसच्या उमेदवार श्रीमती जयश्री जाधव (Jayshree Jadhav) यांनी सांगितले. त्यांनी साम टीव्हीशी संवाद साधला.

कोल्हापूर उत्तर विधानसभा मतदारसंघाच्या पोटनिवडणुकीची रणधुमाळी सध्या सुरु आहे. काँग्रेसचे आमदार (कै.) चंद्रकांत जाधव यांच्या पत्नी श्रीमती जयश्री जाधव या निवडणूकीच्या रिंगणात उतरल्या आहेत. मुख्यमंत्री उध्दव ठाकरे यांनी काॅंग्रेसला उमेदवारी दिल्याने शिवसेना नेत्याकडून नाराजीचा सुर उमटला आहे. या रणधुमाळीत भाजपला रोखण्यासाठी महाविकास आघाडी एकसंघपणे काम करणार असल्याचे पालकमंत्री सतेज पाटील यांनी आज सांगितले. कोल्हापुरात भाजप आणि काॅग्रेसमध्ये चुरस होणार आहे. या निवडणूकीत काँग्रेसच्या उमेदवार श्रीमती जयश्री जाधव यांनी कोणता अजेंडा हाती घेतला आहे हे जाणून घेण्यासाठी साम टीव्हीचे ब्यूरो चिफ संभाजी थोरात यांनी त्यांच्याशी संवाद साधला.

यावेळी जयश्री जाधव म्हणाल्या, भाजपचे प्रदेशाध्यक्ष चंद्रकांत पाटील यांनी माझी भेट घेतली होती. त्यानी भाजपमधून निवडणूक लढावी असा प्रस्ताव ठेवला होता. मात्र माझ्या पतीने जो झेंडा हाती घेतला आहे त्याची पूर्तता करण्यासाठी काॅग्रसमधून उमेदवारी घेण्याचा निश्चय केला. आगामी काळात माझ्या पतीचे कोल्हापूर विकासाचे स्वप्न पूर्ण करणार असल्याचेही त्यांनी सांगितले.