Congress MLA : 'मविआ'ला बसणार मोठा धक्का? अजित पवारांनंतर काँग्रेसचे आमदार फुटणार; भाजप खासदाराच्या दाव्याने खळबळ

पंढरपूर : राष्ट्रवादी काँग्रेसचे नेते उपमुख्यमंत्री अजित पवार (Ajit Pawar) यांच्यासह राष्ट्रवादीचे आमदार महाविकास आघाडीतून बाहेर पडल्यानंतर काँग्रेस आमदारांमध्ये अस्वस्थता पसरली आहे. लवकरच काँग्रेसचे आमदार महाविकास आघाडी फोडून बाहेर पडतील, असा खळबळजनक गौप्यस्फोट माढ्याचे खासदार रणजितसिंह निंबाळकर यांनी केला.

महाविकास आघाडी फुटल्यानंतर काँग्रेसचे आमदार भाजपमध्ये सहभागी होतील, असा दावाही खासदार निंबाळकर (Ranjitsingh Nimbalkar) यांनी केला. ते शनिवारी पंढरपुरात पत्रकारांशी संवाद साधत होते. काँग्रेस (Congress) सध्या महाविकास आघाडीचे नेतृत्व करीत असली तरी शरद पवारांच्या राष्ट्रवादी आणि उद्धव ठाकरेंच्या शिवसेनेसोबत जाऊन काँग्रेसचे नुकसान होईल, अशी त्यांच्यामध्ये भीती आहे.

त्यामुळेच काँग्रेस महाविकास आघाडीतून बाहेर पडेल, असेही खासदार निंबाळकर यांनी स्पष्ट केले. अर्थमंत्री अजित पवार यांनी मतदार संघातील विकासकामांसाठीच सर्व पक्षांच्या आमदारांना भरीव असा निधी दिला आहे. त्यातून कोणी आमदार स्वतःची कामे करत नाही.

आमदार रोहित पवारांना आमदार निधी विषयाचा अभ्यास थोडा कमी असावा, असा टोलाही खासदार रणजितसिंह निंबाळकर यांनी लगावला. यावेळी भाजपचे पांडुरंग वाघमोडे, आमदार बबनराव शिंदे, जिल्हा दूध संघाचे अध्यक्ष रणजित शिंदे, उत्तम जानकर आदी उपस्थित होते.