'...म्हणून राज ठाकरेंची निराशा'; भाषणावर कॉंग्रेसची प्रतिक्रिया

आज मुंबईच्या शिवाजी पार्क येथे मनसे अध्यक्ष राज ठाकरे (Raj Thackeray) यांनी मनसेच्या पाडवा मेळाव्यात (Gudi Padwa Melava 2022) जोरदार भाषण केलं. यामध्ये त्यांनी मुख्यमंत्री उध्दव ठाकरे आणि राज्यातील महाविकास आघाडी सरकार यासोबतच राष्ट्रवादी कॉंग्रेसचे अध्यक्ष शरद पवार (Sharad Pawar) यांच्यावर देखील टिका केली. त्यांनी राष्ट्रवादी(NCP) वर जातीवादाचे आरोप केले आहेत. या राज ठाकरेंच्या भूमिकेला कॉंग्रेसकडून प्रत्युत्तर देण्यात आलं आहे.

केवळ सत्तेत सहभाग मिळत नाही म्हणून राज ठाकरेंची निराशा झाल्याची प्रतिक्रिया कॉंग्रेसकडून देण्यात आली. कॉंग्रेसचे नेते अतुल लोंढे म्हणाले की, "वा साहेब आपण विकासाच्या ब्लू प्रिंटपासून राजकारण सुरु केलं होतं. विकासाच्या मुद्द्यावर बोलत होते. किती कोलांटउड्या मारल्या आज आपण जातीत्या राजकारणाचा आरोप शरद पवार यांच्यावर केले आणि स्वतः जातीच्या राजकारणावरुन धर्माकडं राजकारण नेण्याच्या गोष्टी करता.

ते पुढं म्हणाले की, 'आपणाला कल्पना असेल मध्ययुगीन काळात या धर्मांध राजकरणामुळे अधःकार युग आलं, जेव्हा वेज्ञानिक युग आलं त्यानंतरच जगानं विकास पाहिला. त्यामुळे फक्त सत्तेत सहभाग मिळत नाही, आपले आमदार निवडून येत नाहीत त्याची निराशा आपल्यामध्ये स्पष्टपणे झळकत होती. त्यामुळे विकासाच्या राजकारणाकडून धर्मांध राजकारणाकडे जाण्याचा जो आपला प्रवास आहे त्याला राजकारणातील अधोगती म्हणावे लागेल, असा टोला त्यांनी लगावला.

आपण जर जातीपातीच्या राजकारणात अडकून पडलो असतील, तर कोणतं हिंदू आणि हिंदुत्व घेऊन बसता. राज्यातील जातीपातीच्या राजकारणाला शरद पवार जबाबदार असल्याचा आरोप राज ठाकरेंनी केला. ते पुढं म्हणाले की, राष्ट्रवादीचा जन्म झाला, त्यानंतर जातीपातीचं राजकारण वाढलं. त्यापूर्वी जात ही अभिमान होती. मात्र राष्ट्रवादीच्या जन्मानंतर यांनी दुसऱ्या जातीचा द्वेष करायला शिकवलं. आम्ही जातीतून बाहेर पडणार नाही, तर मग आम्ही हिंदू कधी होणार, असं राज ठाकरे म्हणाले.