मोदींविरुद्ध भाजपा नेते आंदोलन करणार का?

रुग्ण वाढले तर मोदी टिका करतात दुसरीकडे भाजप नेते रुग्ण वाढतील हा प्रयत्न करतात.

कोरोना विषाणूच्या पार्श्वभूमिमुळे मागील दीड वर्षांपासून राज्यातील मंदिरं बंद आहेत. महाराष्ट्र भाजपने मंदिरं उघडण्यासाठी आज, सोमवारी राज्यभर शंखनाद आणि घंटानाद आंदोलन पुकारलं आहे. पुणे, नाशिक, नागपूर, औरंगाबादसह राज्यभरात ठिकठिकाणी भाजपच्या वतीने आंदोलने सुरु आहेत. मंदिरं पुढील आठ दिवसांत उघडावीत, या मागणीसाठी भाजपने आक्रमक भूमिका घेतली आहे. या आंदोलनात कोरोना नियम पायदळी तुडल्याचं दिसत आहे. काँग्रेसनं या मुद्द्यावरून भाजपच्या नेत्यांवर जोरदार हल्लाबोल केला आहे. 'एकीकडे राज्यातील कोरोना परिस्थितीमुळे मोदी सरकार टीका करत आहेत. तर दुसरीकडे भाजपचे नेते कोरोनाला आमंत्रण देत आहेत, अशी टीका काँग्रेस नेते सचिन सावंत यांनी केली.'

महाराष्ट्र काँग्रेसचे प्रवक्ते सचिन सावंत यांनी ट्विट करत भाजपवर निशाणा साधला आहे. ते म्हणाले की, 'भाजपा सरकारांनी कावड यात्रेवर बंदी का घातली? केंद्र सरकारने उत्सवावर निर्बंध घालावेत हे निर्देश दिले आहेत. मोदींविरुद्ध भाजपा नेते आंदोलन करणार का? दुसरी लाट वाढवण्याचे काम भाजपाने केले आता तिसरी लाट लवकर यावी यासाठी यांचा प्रयत्न आहे.'

शंखासूर भाजपा आंदोलनातून सरळ सरळ कोरोना निर्बंधांचे उल्लंघन करत आहे. चंद्रकांत पाटील स्वतः मास्क घालत नाहीत. मोदी सरकारच्या निर्देशांनाही किंमत देत नाहीत. अध्यात्मिक आघाडी या थोतांडातून अध्यात्म या पवित्र मार्गाचे विकृतीकरण हिंदू धर्माचा अवमान आहे. भाविकांच्या जीवाचीही पर्वा नाही, असा हल्लाबोल सचिन सावंत यांनी केला. रुग्ण वाढले तर मोदी टिका करतात दुसरीकडे भाजप नेते रुग्ण वाढतील हा प्रयत्न करतात. जनतेच्या जीवाशी खेळ मांडला आहे. पोलीसांनी कठोर कारवाई करावी बघ्याची भूमिका घेऊ नये, असेही सावंत म्हणाले.