रुग्णसंख्या वाढतेय! रात्री दहाला मुख्यमंत्री घेणार आढावा बैठक

मुंबई: महाराष्ट्रातील कोरोना आणि ओमिक्रॉनच्या (Omicron Variant) नव्या प्रकरणांची वाढती संख्या पाहता मुख्यमंत्री उद्धव ठाकरे (Chief Minister Uddhav Thackeray) आज रात्री 10 वाजता व्हिडिओ कॉन्फरन्सिंगद्वारे कोव्हीड टास्क फोर्ससोबत बैठक घेणार आहेत, अशी माहिती मुख्यमंत्री सचिवालयीतल जनसंपर्क कक्षाने दिली आहे.

मोदींचीही आढावा बैठक

देशात ओमिक्रॉन (Omicron) या कोरोनाच्या नव्या व्हेरियंटच्या संसर्गबाधित रुग्णांमध्ये दिवसेंदिवस वाढ होताना दिसत आहे. आजच्या घडीला देशात ओमिक्रॉन बाधितांची एकूण संख्या २८४ वर पोहोचली आहे. ओमिक्रॉनच्या संसर्गाचं वाढतं प्रमाणं हे तिसऱ्या लाटेला निमंत्रण देऊ शकतं या पार्श्वभूमीवर पंतप्रधान नरेंद्र मोदी (PM Modi) यांच्या अध्यक्षतेखाली ओमिक्रॉन आढावा बैठक राजधानीत सुरु आहे. या बैठकीला नीती आयोगाचे (Niti Aayog) सदस्य उपस्थित आहेत.

मोदींच्या अध्यक्षतेखालील या बैठकीच्या पार्श्वभूमीवर केंद्र सरकारनं राज्य सरकारांना दक्षता समिती नेमण्याची सूचना केली असून कोरोनाच्या स्थितीचा आढावा घेण्यास सांगितलं आहे. त्याचबरोबर राज्य आणि केंद्रशासित प्रदेशांना सणांनिमित्त होणाऱ्या गर्दीत कोविड नियमावलीचं योग्य पालन होतंय की नाही, यावर लक्ष ठेवण्याच्या सूचनाही देण्यात आल्या आहेत. तसेच कन्टेन्मेंट झोन तयार करण्याच्या आणि नाईट कर्फ्यू लावण्याच्या सूचनाही करण्यात आल्या आहेत.

मध्य प्रदेशात नाईट कर्फ्यू

वाढत्या कोरोना रुग्णांमुळे मध्य प्रदेशमध्ये रात्री कर्फ्यू (Night Curfew) लागू करण्यात आला आहे. आज रात्री 11 वाजल्यापासून पहाटे 5 वाजेपर्यंत मध्य प्रदेशमध्ये (Madhya Pradesh) हा नाईट कर्फ्यू असणार आहे. कोरोना रुग्णांचा वाढता आकडा लक्षात घेता मध्य प्रदेशा राज्य सरकारने खबरदारी म्हणून हा नाईट कर्फ्यू लागू केला आहे.

जगभरातील स्थिती

- ओमिक्रॉनचा संसर्ग १०६ देशांत पसरला

- चीनमध्ये शिआन शहरात लॉकडाउन

- ओमिक्रॉनवर लसीसाठी अॅस्ट्राझेनेकाकडून संशोधन सुरू

- नाताळापूर्वी नवे निर्बंध न लावण्याचा ब्रिटनचा निर्णय

- डेल्टापेक्षा ओमिक्रॉन कमी `संहारक` असल्याचा ब्रिटनमधील संशोधनातील निष्कर्ष

- दक्षिण कोरियात गेल्या २४ तासांत कोरोनाच्या १०९ रुग्णांचा मृत्यू, आणखी ६९१९ जणांना संसर्ग, यात ओमिक्रॉनचे १२ रुग्ण