फडणवीसांची चौकशी पूर्ण; भाजप नेत्यांची बैठक सुरु

फोन टॅपिंगप्रकरणी राज्याचे विरोधीपक्षनेते देवेंद्रजी फडणवीस यांना नोटीस बजावण्यात आली होती. या प्रकरणाच्या चौकशीसाठी बीकेसी पोलिस ठाण्याचे पोलिस फडवीस यांच्या सागर या निवासस्थानी पोहोचले. सहाय्यक पोलिस आयुक्त, वांद्रे सायबर विभाग, नितीन जाधव यांच्या मार्गदर्शनखाली ३ पोलिस अधिकारी सागर बंगल्यावर आले. देवेंद्र फडणवीस यांची या प्रकरणी जवळपास दोन तास चौकशी करण्यात आली.

पोलिस आयुक्त नितीन जाधव, पोलिस उपायुक्त हेमराजसिंग राजपूत हे चौकशीसाठी सागर बंगल्यावर आले होते. देवेंद्र फडणवीस यांचा १२ वाजल्यापासून जबाब नोंदवण्यास सुरुवात झाली. डीसीपी हेमराजसिंग राजपूत यांनी जबाब नोंदवून घेतला. जवळपास दोन तासांनी ही जबाब नोंदवण्याची प्रक्रिया पूर्ण झाली आहे. डीसीपी, एसीपी दर्जाच्या अधिकाऱ्यांनी त्यांचा जबाब नोंदवून घेतला. पोलिस निघून गेल्यानंतर भाजप नेत्यांची सागर निवासस्थानी बैठक सुरु आहे. यामध्ये किरिट सोमय्या, प्रविण दरेकर. अतुल भातखळकर, प्रसाद लाड, नितेश राणे यांच्यासह इतर नेते उपस्थित आहेत.

दरम्यान, त्याआधी फडणवीस यांच्या घरी भाजप नेतेही पोहोचले होते. प्रसाद लाड, नितेश राणे हेसुद्धा उपस्थित होते. प्रवीण दरेकर यांनी फडवीसांना आलेल्या नोटिसीसंदर्भात बोलताना सांगितलं की, फोन टॅपिंग प्रकरणी आज सायबर क्राईमचे अधिकारी विरोधी पक्ष नेते देवेंद्र फडणवीस यांचा जबाब नोंदवण्यासाठी त्यांच्या घरी येत आहेत. आधी त्यांना जवाब नोंदवण्यासाठी बिकेसी येथे बोलावले होते. मात्र भाजप आक्रमक झाल्याने आज पोलीस स्वतः त्यांच्या घरी येत आहेत. मात्र हे सरकार बिथरले असून, त्यांना आपण काय करतोय हे कळत नाही असंही दरेकर यांनी म्हटलं होतं.