'समजत नाही अशी मंडळी बोलतात', फडणवीसांचा पवारांना टोला

मुंबई : केंद्राने दिवाळीच्या मुहूर्तावर अचानक पेट्रोल-डिझेलचे दर (Petrol Diesel prices) कमी केले. त्यानंतरही काही राज्यांनी देखील इंधनावरील कर कमी करून राज्यातील जनतेला दिलासा देण्याचा प्रयत्न केला. यामध्ये महाराष्ट्राच्या शेजारी असलेल्या कर्नाटकचा देखील समावेश आहे. त्यामुळे महाराष्ट्र सरकारने पेट्रोल-डिझेलवरील कर कधी कमी करणार? असा प्रश्न शरद पवारांना (Sharad Pawar) विचारण्यात आला होता. त्यावेळी त्यांनी जीएसटीच्या मुद्द्यावरून केंद्र सरकारवर टीका केली. त्यालाच आता विरोधी पक्षनेते देवेंद्र फडणवीस (Devendra Fadnavis) यांनी उत्तर दिले आहे.

बारामतीमध्ये पवार कुटुंबीयांचा दिवाळी पाडव्याचा कार्यक्रम पार पडला. यावेळी शरद पवारांनी माध्यमांशी संवाद साधला. तसेच पेट्रोल-डिझेल दराच्या बाबतील राज्य सरकारने निश्चित दिलासा देऊ असे म्हटले आहे. पण, केंद्राने राज्याचे जीएसटीचे पैसे अजूनही दिले नाहीत. केंद्राने ते पैसे दिले तर राज्याला जनतेच्या सोयीचे निर्णय घेणे सोपे जाईल, असं पवार म्हणाले होते.

दरम्यान, “मी दुर्दैवाने म्हणतो की ज्यांना काही समजतच नाही, अशी मंडळी यात बोलत आहेत. जीएसटीची रक्कम मिळतेय. गेल्या वर्षीही ही रक्कम मिळाली. यंदा देखील मिळणार आहे. जीएसटीचं रक्कम कुठेच जात नाही. पण केंद्रानं ५ रुपये कर कमी केला की आपोआप ७ रुपये टॅक्स कमी होतो. हाच कर १०-१२ रुपयांनी कमी करा, असं फडणवीस म्हणाले.