शेतकरी आत्महत्यांबद्दल केंद्रेकरांनी सादर केलेल्या अहवालावर फडणवीसांचं मोठं विधान; म्हणाले...

छत्रपती संभाजीनगर - मराठवाड्यात आज मंत्रिमंडळाची बैठक पार पडली. या बैठकीनंतर मुख्यमंत्री एकनाथ शिंदे यांनी मराठवाड्याच्या विकासासाठी हजारो कोटींच्या घोषणा करण्यात आल्या. यावेळी देवेंद्र फडणवीस यांनी माजी विभागीय आयुक्त सुनील केंद्रेकर यांच्या अहवालाबाबत मोठं विधान केलं आहे.

फडणवीस म्हणाले की, मी देखील केंद्रेकर यांचा अहवाल पाहिला. त्यांची समिती अधिकृत नव्हती. त्यांनी चांगल काम केलं. त्यांची शेतकऱ्यांना अडचणीतून बाहेर काढण्यासाठीची जी काही मतं आहेत, त्याचा आम्ही नक्की विचार करणार आहोत. आता ज्याकाही उपायोजना मुख्यमंत्र्यांनी घोषित केल्या, त्या शेतकरी आत्महत्या रोखण्याशी संबंधीतच आहे. दुधाळ जनावरे देणं ही उपायोजना आहे. मराठवाड्यातील सर्व गावं त्यात समाविष्ट करत असल्याचं फडणवीस यांनी म्हटलं.

मराठवाडा हा दुष्काळग्रस्त असून शेतकरी आत्महत्यांसाठी ओळखला जातो. आतापर्यंत शेतकऱ्यांच्या आत्महत्या रोखण्यासाठी केलेले सर्व प्रयत्न फोल ठरले आहेत. या सगळ्या गोष्टींचा विचार करून केंद्रेकरांनी तब्बल १०४ प्रश्नांचा समावेश असलेला अर्ज तयार करून सर्वे केला होता. १० लाख शेतकऱ्यांचा अभ्यास केल्याचं सांगण्यात येतं.

स्वेच्छानिवृत्ती स्वीकारण्याच्या दोन दिवस आधी केंद्रेकर यांनी अहवाल सरकारला सादर केला होता. सर्व्हेतील वर्गवारीनूसार १ लाखाहून अधिक शेतकरी आत्महत्येच्या विचारात आहेत. तर तब्बल तीन लाख शेतकऱ्यांना देखील अहवालाच्या संवेदनशील यादीत दाखवण्यात आलं होतं. तसेच पेरणीसाठी काढावे लागणारे कर्ज, मुला-मुलींचे शिक्षण, त्यांचे लग्न, शेतमालाचे नुकसान या सगळ्याच गोष्टी शेतकरी आत्महत्येस कारणीभूत ठरत असल्याचं अहवालात नमूद करण्यात आल्याचं सांगण्यात येतं.