त्यांचे पंख छाटले नाहीत तर...; तृप्ती देसाईंनी घेतली फडणवीसांची बाजू

राज्यात गेल्या १० -१५ दिवसांपासून सत्तानाट्य रंगलं आहे. या सत्तानाट्यामध्येच शिवसेना नेते एकनाथ शिंदे मुख्यमंत्री झाले तर देवेंद्र फडणवीस उपमुख्यमंत्री झाले आहेत. मात्र मुख्यमंत्रिपदी येतील अशी अपेक्षा असतानाच पक्षश्रेष्ठींच्या आदेशामुळे फडणवीस उपमुख्यमंत्री झाले. त्यानंतर एक नाराजीचा सूर उमटत आहे. याचविषयी सामाजिक कार्यकर्त्या तृप्ती देसाई यांनी फडणवीसांची बाजू घेतली आहे. (Eknath Shinde Devendra Fadnavis)

तृप्ती देसाई (Trupti Desai) यांनी याविषयी सोशल मीडियावर पोस्ट केली आहे. आपल्या पोस्टमध्ये तृप्ती देसाई म्हणतात की, देवेंद्रजींचे पंख छाटले गेले नाहीत, तर अजून उंच भरारी मारता यावी यासाठी हा केलेला प्रयोग आहे‌. मुख्यमंत्री पदावर असल्यावर त्यांना नगरपालिका निवडणुकीत विशेष लक्ष देता येणार नाही.

५० आमदारांना सोबत घेऊन भाजपाचा हात धरत एकनाथ शिंदेंनी राज्यात सरकार स्थापन केलं. मुख्यमंत्रिपदाची घोषणा करताना देवेंद्र फडणवीसांनी (Devendra Fadnavis) एकनाथ शिंदे मुख्यमंत्री तर आपण सत्तेबाहेर राहणार असं स्पष्ट केलं. मात्र शपथविधीला अवघी काही मिनिटे राहिलेली असतानाच थेट भाजपा पक्षश्रेष्ठी अमित शाह आणि जे.पी. नड्डा यांनी देवेंद्र फडणवीस उपमुख्यमंत्री होतील, अशी घोषणा केली. अखेर पक्षाच्या आदेशामुळे फडणवीसांना उपमुख्यमंत्री व्हावं लागलं.