Nagpur News: मंदिरात तोकडे कपडे बॅन ! नागपूरपासून सुरवात, या ३०० मंदिरात होणार लागू

राज्यात गेल्या काही दिवसांपासून मंदिरांवरुन वाद सुरु असल्याचे दिसुन येत आहे. काही दिवसांपूर्वी तुळजापूरच्या तुळजाभवानी मंदिरातील ड्रेसकोडच्या फलकावरुन मोठा वाद निर्माण झाला होता. त्यातच आता महाराष्ट्र मंदिर महासंघाने एक मोठी घोषणा केली आहे. नागपुरमधील चार मंदिरांमध्ये वस्त्र संहिता लागू करण्यात आली आहे.

महाराष्ट्रातील मंदिरांमध्ये वस्त्र संहिता लागू झाली पाहिजे, अशी मागणी महाराष्ट्र मंदिर महासंघाकडून करण्यात आली आहे. पहिल्या महिन्यात नागपुरातील 25 तर राज्यभरातील 300पेक्षा जास्त मंदिरांमध्ये ही वस्त्र संहिता लागू करण्याचे प्रयत्न करणार असल्याचंही महाराष्ट्र मंदिर महासंघाकडून सांगण्यात आलं आहे.

नागपुरातील गोपाळ कृष्ण मंदिर, धनतोली, संकटमोचन पंचमुख हनुमान मंदिर, बेलोरी, ब्रहस्पती मंदिर, कोन्होलीबारा, दुर्गामाता मंदिर, हिलटॉप चार मंदिरात ही संहिता लागू करण्यात आली आहे.

महाराष्ट्र मंदिर महासंघाची नागपुरात पत्रकार परिषद पार पडली. या पत्रकार परिषदेत सुनील घनवट यांनी याबाबतची माहिती दिली आहे. जर कोणी मंदिरात अशोभनीय, तोकडे कपडे घालून आले तर त्याला परत पाठवण्याऐवजी मंदिराच्या प्रवेशद्वारावर शॉल, ओढणी, धोतर असे कपडे देण्यात येणार आहेत. भाविकाला ते वापरून पांघरून मंदिरात जाता येणार असल्याचं त्यांनी म्हंटलं आहे. केवळ महिलाच नाही तर पुरुषांसाठी देखील हे नियम आहेत.