समीर वानखेडे आणि राजकीय नेत्यांमधील वादाशी संबंध नाही : आर्यन खान

कार्डेलिया क्रूज ड्रग्ज केस प्रकरणात आर्यन खान ३ ऑक्टोबरपासून अटकेत आहे. मंगळवारी झालेल्या सुनावणीवेळी न्यायालयात एनसीबीने आर्यन खानचा जामीन फेटाळायलाच हवा अशी मागणी केली. साक्षीदारांना फोडण्याचे आणि पुराव्यांशी छेडछाडीचा प्रयत्न केला जात असल्याचं एनसीबीने यावेळी न्यायालयात सांगितलं. मुंबई उच्च न्यायालयात या प्रकरणाची सुनावणी सुरु आहे.

आर्यन खानच्या वकिलांनी उच्च न्यायालयात म्हटलं की, आर्यन खानचे प्रभाकर साईल आणि त्याचा मालक किरण गोसावी याच्याशी काही संबंध नाही. तसंच सादर केलेल्या प्रतिज्ञापत्रात असंही म्हटलं की, 'एनसीबीचे विभागीय संचालक आणि इतरांचा जो काही वाद सुरु आहे त्याच्याशी आर्यनचा काहीएक संबंध नाही.' सध्या समीर वानखेडे यांच्यावर अल्पसंख्यांक मंत्री नवाब मलिक यांनी गंभीर असे आरोप केले आहेत. त्याबाबत पत्रकार परिषदेतून अनेक खुलासे केले आहेत.

आर्यन खानचे आंतरराष्ट्रीय कनेक्शनमधून दिसून येतं की, तो जसं दाखवतोय तसं नाहीय. त्यानं स्वत: ग्राहक असल्याचं दाखवलं आहे. त्याच्याविरुद्ध पुरावा नाही असं म्हणणं थोडं घाईचं ठरेल असंही एनसीबीने न्यायालयात म्हटलं. आर्यनला जामीन देण्यात येऊ नये असं म्हणत एनसीबीने विरोध दर्शवला.

प्रभाकर साईलने केलेल्या आरोपाचा संदर्भ देत एनसीबीने म्हटलं की, साक्षीदारांना फितूर केलं जातंय. तपासात अडथळे निर्माण केले जात आहेत. त्यामुळे जामीन दिला जाऊ नये. साक्षीदारांवर दबाव निर्माण करून तपासात दिशाभूल करण्याचा प्रयत्न केला जात असल्यान आर्यनला जामीन नाकारण्यात यावा अशी मागणी एनसीबीने केली. शाहरुख खानची मॅनेजर पूजा दादलानीने पंच असलेल्या साक्षीदारांवर दबाव टाकला आहे. आर्यन खानचा जामीन फेटाळण्यासाठी हे एक कारण पुरेसं आहे.