भाजपच्या मिशन मोडमुळे पालिकेत बदल्यांचे वारे 

मुंबई: महानगरपालिकेतील भ्रष्टाचाराविरोधात भाजपने नुकत्याच झालेल्या पावसाळी अधिवेशनात रणशिंग फुंकले आहे. पालिका निवडणुकीच्या तोंडावरच भाजप आक्रमक झाल्याचे एकीकडे पहायला मिळत आहे. तर भाजपच्या आक्रमक पवित्र्यामुळे आता मुंबई महानगरपालिकेतही अधिकाऱ्यांची खांदेपालट सुरू झाली आहे. 

महापालिका आयुक्त इक्बालसिंह चहल यांनी उपायुक्त (मध्यवर्ती खरेदी खाते) रमाकांत बिरादर यांची बदली करून त्या खात्याचा भार परिमंडळ दोनचे उपायुक्त हर्षद काळे यांच्या हाती सोपवला आहे. तर काळे यांच्याकडील खात्यांची जबाबदारी रमाकांत बिरादर यांच्याकडे सोपवली आहे.

गणेशोत्सवाच्या काळात कोणत्याही प्रकारची बदली केली जाऊ नये अशा प्रकारची प्रथा असतानाच महापालिका आयुक्त व प्रशासक इक्बालसिंह चहल यांनी परिमंडळ दोनचे उपायुक्त व मुंबईतील सार्वजनिक गणेशोत्सव मंडळांचे समन्वय असलेल्या हर्षद काळे यांची बदली उपायुक्त( मध्यवर्ती खरेदी खाते) या पदावर केली आहे. तर रमाकांत बिरादर यांची बदली उपायुक्त (परिमंडळ २) मुंबई जिल्हा एड्स नियंत्रणा संस्थेच्या प्रकल्प संचालकपदी केली आहे.

आदित्य ठाकरेंच्या नजीकच्या अधिकाऱ्यांच्याही बदल्या

आदित्य ठाकरे यांच्या नजीकच्या पालिकेतील अधिकाऱ्यांची प्रशासनाने शुक्रवारी बदली केली. त्यामध्ये सहाय्यक आयुक्तांची खांदेपालट झाली आहे. जी दक्षिणचे सहाय्यक आयुक्त शरद उघडे यांची बदली डी वॉर्डमध्ये करण्यात आली आहे. त्यांच्याकडे आदित्य ठाकरेंचा वरळी मतदारसंघाचा भाग असल्याने ते अतिशय नजीकच्या अधिकाऱ्यांपैकी एक असे अधिकारी होते.

तर डी वॉर्डचे सहाय्यक आयुक्त असलेल्या प्रशांत गायकडवाड यांच्याकडे यापुढे मालमत्ता विभागाची जबाबदारी असणार आहे. तर संतोष कुमार धोंडे यांना जी दक्षिण विभागाची सहाय्यक आयुक्त म्हणून जबाबदारी देण्यात आली आहे. तर राजेश अक्रे यांना पी दक्षिणचे सहाय्यक आयुक्त म्हणून जबाबदारी देण्यात आली आहे. याआधीच आदित्य ठाकरे यांचे अतिशय जवळचे म्हणून मानले जाणाऱ्या किरण दिघावकर यांची दीड महिन्यात दोन वेळा बदली झाली आहे.