चंद्रकांतदादांनी शब्द फिरवला; एकनाथ खडसे, अमोल मिटकरींचा टोला

कोल्हापुर उत्तरमध्ये भाजपाचा पराभव झाल्यानंतर भाजपा प्रदेशाध्यक्ष चंद्रकांत पाटील यांच्याविषयी राजकिय वर्तुळात चर्चेला उधान आलं आहे. चंद्रकांत पाटील यांनी प्रचारा दरम्यान पराभव झाला तर राजकारण सोडून हिमालयात जाईन असे वक्तव्य केले होते. या वक्तव्याची खिल्ली मविआकडून उडवली जात आहे. दरम्यान राष्ट्रवादी कॉग्रेसचे नेते एकनाथ खडसे (Eknath Khadse) आणि राष्ट्रवादीचे आमदार अमोल मिटकरी (Amol Mitkari) यांनी चंद्रकांत पाटलांवर निशाणा साधलाय. चंद्रकांतदादांनी हिमालयात जायचा शब्द फिरवला असा टोला खडसेंनी लगावलाय. तर पराभवाची जबाबदारी स्वीकारून चंद्रकांतदादांनी हिमालयात जावं असा सल्ला अमोल मिटकरी यांनी दिला आहे.

एकनाथ खडसे म्हणाले, कोल्हापूरच्या निवडणूकीचे वैशिष्ट्य म्हणजे ही निवडणूक चंद्रकांतदादांच्या अध्यक्षतेखाली होती.त्यामुळे सर्व फोकस हा त्यांच्याकडे होता. त्यांच्या प्रतिष्ठेची निवडणूक असल्याने त्यांनी भिष्म प्रतिज्ञा घेतली होती. पराभव झाल्यास हिमालयात जाईन असे ते म्हणाले होते. मात्र निकाल जाहीर होताच त्यांनी शब्द फिरवला. भाजपाने जनतेला दिलेला शब्द फिरवल्याचे आश्चर्य वाटते असेही ते म्हणाले.

चंद्रकांतदादांवर टीका करताना मिटकरी म्हणाले, राम नवमी दिवशी रामाचा धनुष्य जसा मविआच्या कामास आला तसा आज हनुमानाचा गदा सुध्दा कामाला आला. कोल्हापूरकरांनी हा गदा भाजपाच्या टाळक्यात मारल्याने त्यांचा पराभव झाला. तो प्रामाणिकपणे दादांनी कबुल करावा आणि महाराष्ट्राला जो शब्द दिला होता तो पाळावा असा इशारा त्यांनी दिला. हिमालयात जाण्याची तारीख कळवावी आणि राजकारणातून सन्यांस घ्यावा मी देखील सामान पोहचवण्यासाठी येईन असेही ते म्हणाले.