शिंदे सरकारची ताकद किती? फडणवीसांनी आकडेच मांडले!

राज्यात गेल्या ९ - १० दिवसांपासून चाललेल्या सत्ताकारणाचा आता शेवटचा अंक चालू असल्याचं दिसत आहे. भाजपाच्या साथीने शिवसेनेचे बंडखोर नेते आणि मविआ सरकारमधले नगरविकास मंत्री एकनाथ शिंदे आता मुख्यमंत्रीपदी विराजमान होणार आहेत. अवघ्या काही वेळात त्यांचा शपथविधी होणार आहे. देवेंद्र फडणवीसांनी बहुमताची ताकद दाखवत ही घोषणा केली आहे. (Eknath Shinde New Chief Minister)

शिवसेनेच्या बंडखोर आमदारांसोबत सूरत, गुवाहाटी, गोवा असा दौरा करुन अखेर एकनाथ शिंदे (Eknath Shinde) आज मुंबईत परतले. काल उद्धव ठाकरेंनी (Uddhav Thackeray) मुख्यमंत्रिपदाचा राजीनामा दिल्यानंतर आज लगेचच देवेंद्र फडणवीस आणि भाजपाने बहुमत सिद्ध करण्याची धावपळ सुरू केली. दरम्यान, गोव्यातून शिंदेही मुंबईत आले. राज्यपालांची भेट घेतली आणि बहुमताचा दावा केला. राज्यपालांनीही ती मान्य केली आणि अखेर सत्तासंघर्ष पूर्णत्वाकडे आला.

काही वेळापूर्वीच पत्रकार परिषद घेत देवेंद्र फडणवीस (Devendra Fadnavis) यांनी एकनाथ शिंदेंना मुख्यमंत्री म्हणून घोषित केलं. त्याचबरोबर त्यांनी आपल्याकडच्या संख्याबळाचं गणितही मांडलं. शिवसेनेचा (Shivsena) विधिमंडळ गट, भाजपा (BJP) विधिमंडळ गट, अपक्ष १६ आमदार आपल्यासोबत असल्याचं देवेंद्र फडणवीसांनी स्पष्ट केलं आहे.

दरम्यान, आता काही वेळातच एकनाथ शिंदे मुख्यमंत्रिपदाची शपथ घेणार आहेत. दरम्यान, आज केवळ एकच शपथविधी होईल. शिंदे गटातले आमदार अजूनही गोव्यातल्या हॉटेलमध्येच आहेत .