Uday Samant:''भाकरीमध्ये वाटेकरी झाले पण... शिंदेंच्याच हातात खातेवाटप'', उदय सामंतांनी उद्भवलेल्या परिस्थितीवर दिलं स्पष्टीकरण

Maharashtra Political Crisis: एकनाथ शिंदे राजीनामा देणार, शिंदेंचे दोन आमदार भीडले, शिंदेंचे आमदार ठाकरेंच्या संपर्कात... या सगळ्या वृत्तांच्या अनुषंगाने राज्याचे उद्योगमंत्री तथा शिवसेना नेते उदय सामंत यांनी स्पष्टीकरण दिलं. शिंदे गटाचे प्रतोद भरत गोगावले यांनी भाकरीमध्ये वाटेकरी झाल्याचं विधान केलं होतं त्याचंही उत्तर सामंतांनी दिलं.

काय म्हणाले होते गोगावले?

मंगळवारी, ४ जुलै रोजी बोलतांना गोगावले म्हणाले होते की, नाराज होऊन आता काय करणार. जी वस्तुस्थिती आहे, ती स्वीकारली पाहिजे आणि तिला सामोरे गेले पाहिजे, त्यामुळे आता नाराज होऊन काय चालणार नाही.

थोडीफार नाराजी प्रत्येकांची राहणारच आहे. कारण, ज्याला एक भाकरी खायची होती, आता अर्धी मिळाली आहे आणि ज्याला अर्धी खायची होती, त्याला पाव मिळणार आहे. राजकारणाचं समीकरण घेऊन पुढे चालायचं असेल तर ते सर्व स्वीकारून पुढे चालायला पाहिजे, अशा शब्दांत अजित पवार यांच्या सत्तेतील सहभागाबाबत शिंदे गटाचे आमदार भरत गोगावले यांनी हतबलता व्यक्त केली होती.

आज उदय सामंत बोलतांना म्हणाले की, भाकरीमध्ये वाटेकरी झाले, जी भाकर पूर्ण खाणार होतोत ती कमी वाट्याला येणार आहे. काही मंत्रिपदं इकडे-तिकडे होतील, असं गोगावलेंना म्हणायचं होतं. कुठेही नारीजी नाहीये. एकनाथ शिंदे हे राजीनामा देणार नाहीत किंवा आमचे आमदार कुणाच्याही संपर्कात नाहीत. या सगळ्या अफवा पसरवल्या जात असल्याचं सामंतांनी स्पष्ट केलं.

काय म्हणाले उदय सामंत?

• एकनाथ शिंदे मुख्यमंत्रीपदाचा राजीनामा देणार ही बातमी चुकीची आहे.

• आम्ही राजीनामा देणारे नव्हे तर घेणारे लोक आहोत

• ज्या पक्षातून उठाव झाला तिथे परत जाण्याचा प्रश्न नाही

• राष्ट्रवादीमुळे आम्ही नाराज नाहीत

• एकनाथ शिंदेंची बदनामी, त्यांच्यावर टीका आणि सरकार पडण्याची तारीख द्यायची; असेच प्रकार घडले

• देवेंद्र फडणवीस फडणवीसांनी वारंवार सांगितलं की एकनाथ शिंदेंच्या नेतृत्वात निवडणुका होतील

• दोन आमदारांमध्ये भांडण झालेलं नाही. जे घडलेलंच नाही ते घडल्याचं सांगितलं जात आहे

• एकनाथ शिंदेंच्या नेतृत्वात एकमेकांचा सन्मान ठेवला जाईल

• खातेवाटपाचा अधिकार मुख्यमंत्र्यांचा असतो, ते ठरवतील

• तिनही नेत्यांना प्रत्येक मतदारसंघांची जाण आहे