Maratha reservation : जरांगे पाटलांच्या भूमिकेनंतर एकनाथ शिंदेंची प्रतिक्रिया; म्हणाले, मराठा आरक्षणासाठी...

मुंबई - जालना जिल्ह्यात मराठा आरक्षणाच्या मागणीसाठी आंदोलन पुकारण्यात आले आहे. आंदोलनाचा आज १०वा दिवस असून मनोज जरांगे पाटील मराठा आरक्षणावर ठाम आहे. आज सरकारच्या जीआरनंतर ते उपोषण सोडतील असं वाटलं होतं. मात्र त्यांनी आरक्षणावर ठाम असल्याचं सांगितलं. तसेच सुधारित जीआर आणि पाणी सोबतच आणा असं खडसावून सांगितलं. यावर एकनाथ शिंदे यांनी प्रतिक्रिया दिली आहे.

एकनाथ शिंदे म्हणाले की, मराठा आऱक्षणाबाबत सरकार अतिशय गंभीर आहे. जे आरक्षण देवेंद्र फडणीस मुख्यमंत्री असताना दिलं होतं, त्यावेळी मी त्यांच्यासोबत होतो. ते आरक्षण उच्च न्यायालयाने मान्य केलं होतं. दुर्दैवाने महाविकास आघाडीच्या काळात हे आरक्षण रद्द झालं. मविआच्या नाकर्तेपणामुळे आरक्षण गेलं. आता तेच राजकारण करत आहेत.

दरम्यान मराठा आरक्षण देण्यासंदर्भात सरकार कटिबद्ध आहे. ज्यावेळी सुप्रीम कोर्टाने त्रुटी काढल्या त्यावर काम करून मराठा समाज आर्थिक आणि शैक्षणिक मागास आहे हे सिद्ध करण्याच काम सरकार करेल आणि सुप्रीम कोर्टाला विनंती करेल. मराठा आरक्षण देताना सरकार कोणत्याही समाजाचं आरक्षण कमी न करता, आरक्षण देईल, असंही शिंदे यांनी म्हटलं.