अनिल देशमुख प्रकरणात पुण्यातील मोठा अधिकारी ईडीच्या रडारवर

शंभर कोटींच्या वसूली प्रकरणात सध्या माजी गृहमंत्री अनिल देशमुख यांची चांदीवाल आयोगासमोर चौकशी सुरू आहे. सचिन वाझेचीही उर्वरित चौकशी पार पडली. त्याचसोबत देशमुख देखील उपस्थित होते. मात्र देशमुखांशी निगडीत मनी लाँडरिंग आणि पोलीस अधिकाऱ्यांच्या बदल्यांच्या रॅकेटमध्ये पोलीस खात्यातील अनेक अधिकाऱ्यांच्या पाठिशी चौकशीचा ससेमिरा लागला आहे.

माजी गृहमंत्री अनिल देशमुख यांच्या आयपीएस बदली रॅकेटप्रकरणी (IPS Transfer racket) सक्तवसुली संचालनालयानं (ED) आत पोलीस उपायुक्त दर्जाच्या अधिकाऱ्यांची चौकशी करण्यास सुरुवात केली आहे. यामध्ये पुण्याच्या पोलीस उपायुक्तांचा समावेश आहे.

या पूर्वी ईडीने राज्याच्या गृहविभागाचे उपसचिव कैलास गायकवाड(Kailas Gaikwad) यांना समन्स बजावत चौकशीला बोलावलं होतं. काही दिवसांपूर्वी सिताराम कुंटेही(Sitaram Kunte) चौकशीला जाऊन आले. नुकतेच या प्रकरणात आणखी एका डीसीपीचा जबाब ईडीने नोंदवला आहे. ट्रान्सफर पोस्टिंग प्रकरणात ईडीने पुणे वाहतूक पोलिसांचे डीसीपी राहुल श्रीरामे (DCP Rahul Shrirame) यांची चौकशी केली.

ईडीने त्याला गुरुवारी हजर राहण्याचे समन्स पाठवले होते. त्यानंतर श्रीरामे दुपारी एकच्या सुमारास ईडीच्या कार्यालयात पोहोचले. यावेळी त्यांची सुमारे 7 तास चौकशी करत त्यांचा जबाब नोंदवण्यात आला.

आज ईडीने अकोल्याचे पोलीस अधीक्षक जी.श्रीधर यांना चौकशीसाठी समन्स बजावले असून त्यांना आज 11 वाजता हजर राहण्यास सांगितलं आहे.

अकोल्याचे पोलीस अधीक्षक ईडी कार्यालयात?

अकोल्याचे पोलीस अधीक्षक जी. श्रीधर (G.Shridhar) यांना सक्तवसुली संचलनालयाने (ED) समन्स जारी केला आहे. यानुसार त्यांना येत्या 17 डिसेंबरला ईडी कार्यालयात चौकशीसाठी हजर रहावं लागणार आहे. यासाठी ते उपस्थित देखील राहणार असल्याची प्राथमिक माहिती मिळत आहे.

अनिल देशमुख यांच्यासंबंधी मनी लाँडरिंगचं प्रकरण (Money Laundering) सुरू आहे. खंडणी प्रकरणातही त्यांची चांदिवाल आयोगासमोर चौकशी सुरू आहे. या संपूर्ण चौकशीत जी. श्रीधर यांचं नाव समोर आल्याची प्राथमिक माहिती आहे. त्यामुळे ईडीच्या चौकशीनंतर या प्रकणारत श्रीधर यांचा असलेला सहभाग स्पष्ट होण्याची शक्यता आहे.