चिंताजनक! ५ महिन्यात राज्यात १०७६ शेतकऱ्यांच्या आत्महत्या

राज्यात गेल्या काही दिवसांतली शेतकरी आत्महत्यांची (Farmers Suicide) आकडेवारी विधानसभेत सादर करण्यात आली आहे. त्यानुसार जून २०२१ ते ऑक्टोबर २०२१ या कालावधीत तब्बल १०७८ शेतकऱ्यांनी आत्महत्या केल्याची चिंताजनक माहिती समोर आली आहे. विधिमंडळाच्या हिवाळी अधिवेशनात (Maharashtra Assembly Winter Session 2021) विचारण्यात आलेल्या प्रश्नाला उत्तर देताना राज्याचे मदत आणि पुनर्वसन मंत्री विजय वडेट्टीवार (Vijay Wadettiwar) यांनी ही माहिती सभागृहाला दिली. विशेष म्हणजे या प्रकरणातील ४११ प्रकरणं जिल्हास्तरीय समितीने पात्र ठरवलं असल्याचंही त्यांनी सांगितलं आहे. (farmer suicide)

आस्मानी आणि सुल्तानी संकटामुळे डबघाईला आलेल्या शेतकऱ्यांनी नापिकी, नैसर्गिक आपत्ती यांसारख्या कारणांमुळे आत्महत्या केल्याचं समोर आलं आहे. यासंदर्भात सरकारने काय उपाययोजना केल्या असा प्रश्न विरोधकांनी विचारला होता. यावेळी उत्तरामध्ये वडेट्टीवार यांनी दिलेली माहिती चिंताजनक आहे. यावर्षी जून ते ऑक्टोबर या पाच महिन्यांच्या कालावधीत १०७६ शेतकऱ्यांनी आपलं जीवन संपवलं. जिल्हापातळीवरील समितीने यातील ४११ घटनांना पात्र ठरवलं असून इतर २१३ प्रकरणं अपात्र ठरली आहेत. तर ३७२ प्रकरणांची चौकशी अजून सुरू आहे.

यावरील उपाययोजनांची माहिती देताना सत्ताधाऱ्यांनी शेतकऱ्यांना समुपदेशनाची आणि प्रबोधनाची आवश्यक असल्याचं सांगितलं. तसंच मदतीसाठी विशेष कार्यक्रमांच्या माध्यमातून शेतकऱ्यांच्या विकासासाठी कृषी समृद्धी योजनेतून विविध उपाययोजना करण्यात आल्या आहेत.