जैन एरिगेशनचे कोट्यवधी रुपयांचे साहित्य जळून खाक; दिवसभरात आगीची दुसरी घटना

Wardha fire news: आर्वी तालुक्यातील धानोडी येथील निम्न वर्धा प्रकल्पातून उपसा सिंचनाचे काम सुरू आहे. या कामाकरिता ठेवण्यात आलेल्या साहित्याला अचानक आग लागली. ही आग शॉट सर्किटने लागल्याचा अंदाज व्यक्त करण्यात येत आहे. ही घटना मंगळवारी (ता. १३) दुपारच्या सुमारास लागली.

आग लगाल्याचे लक्षात त्यावर ताबा मिळविण्याकरिता अग्निशमन दलाला पाचारण करण्यात आले आहे. त्यांच्याकडून आग आटोक्यात आणण्याचे प्रयत्न सुरू आहेत. या आगीत सिंचनासाठी ठेवण्यात आलेले कोट्यवधी रुपयांच्या साहित्याचा कोळसा झाल्याचे सांगण्यात आले आहे.

विदर्भ पाटबंधारे विभागामार्फत येथील काम जैन एरिगेशन या कंपनीला देण्यात आले आहे. शासनाच्या या योजनेंतर्गत आर्वी तालुक्यातील शेतकऱ्यांना ड्रीप लाऊन देत त्यांना मोफत सिंचनाची सोय देण्यात येत आहे. या कामाकरिता जैन एरिगेशनने मोठ्या प्रमाणात साहित्य ठेवले आहे. हे साहित्य या आगीत जळून खाक झाले. लागलेल्या या आगीचे लोळ दूरपर्यंत दिसून येत आहेत.

दरम्यान, सकाळी एक आगीची भीषण घटना घडली आहे. मुंबई-पुणे द्रुतगती मार्गावर खंडाळा घाटात केमिकल टँकरला भीषण आग लागल्याची घटना समोर आली आहे. या अपघातात आगीचा भडका उडाल्याने चौघांचा मृत्यू झाला आहे. या घटनेत परिसरही आगीने वेढला असून महामार्गावरील वाहतूक विस्कळीत झाली आहे. आज (मंगळवारी) सकाळी साडेअकरा वाजण्याच्या सुमारास ही घटना घडली.