Bhagat Singh Koshyari: अनंत अंबानींकडून घेतलेल्या 15 कोटींचं काय केलं? भगतसिंग कोश्यारींचे स्पष्टीकरण

Bhagat Singh Koshyari : महाराष्ट्राचे आरटीआय कार्यकर्ते अनिल गलगली यांनी भगतसिंग कोश्यारी महाराष्ट्राचे राज्यपाल असताना त्यांच्या संस्थेला किती देणग्या मिळाल्या असा प्रश्न महाराष्ट्र राजभवनाला विचारला होता. मात्र, त्यांना याबाबत कोणतीही माहिती नसल्याचे राजभवनाने म्हटले आहे. 

दरम्यान, अनिल गलगली यांना एक निनावी पत्र मिळाले असून त्यात महाराष्ट्र आणि उत्तराखंडमध्ये खळबळ माजली होती. एका शाळेच्या नावावर 15 कोटी रुपयांची देणगी घेतल्याच्या आरोपावर भगतसिंग कोश्यारी यांच्यावर करण्यात आला होता. यावर त्यांनी स्पष्टीकरण दिले आहे.

महाराष्ट्राचे माजी राज्यपाल भगतसिंग कोश्यारी म्हणाले, मी महाराष्ट्राचा राज्यपाल होतो आणि सर्वसामान्यांसाठी माझे दरवाजे नेहमीच खुले असायचे. सामाजिक कार्याकडे माझा नेहमीच कल होता. एके दिवशी मुकेश अंबानींचा धाकटा मुलगा अनंत अंबानी माझ्याकडे आला. आम्ही एकमेकांशी बोललो. मी अखिल भारतीय संस्थान विद्या भारती विषयी बोललो. जी भारतभरात 20,000 हून अधिक शाळा चालवते.

नैनितालमध्ये पार्वती प्रेमा जगती सरस्वती विहार आहे, जी गेली 40 वर्षांपासून सुरू आहे आणि एक नामांकित निवासी शाळा आहे. लोकांच्या मागणीनुसार, आणखी शाळा उघडल्या जात आहेत. मी अनंत अंबानी यांना सांगितले की, शाळेसाठीही निधी द्या, ज्याचा फायदा ग्रामीण भागालाही होईल आणि त्यांनंतर त्यांनी 15 कोटी रुपये दिले, असे कोश्यारी यांनी सांगितले.

काय होता आरोप?

राज्यपालपद भूषवलेल्या भगतसिंग कोश्यारी यांनी आपल्या पदाचा गैरवापर करून उत्तराखंडमधील शाळेच्या नावावर बरीच संपत्ती जमा केली. ज्या शाळांमध्ये 100 मुलेही शिकत नाहीत अशा शाळांसाठी त्यांनी मोठ्या प्रमाणात देणग्या गोळा केल्या.

या पैशातून तत्कालीन राज्यपाल कोश्यारी यांचे पुतणे दीपेंद्र सिंह कोश्यारी यांनी शाळेच्या आजूबाजूला मोठ्या प्रमाणात जमीन खरेदी करून त्या ठिकाणी रिसॉर्ट सुरू केले. त्यासाठी उद्योगपती अनंत अंबानी यांच्याकडून 15 कोटी रुपये घेण्यात आले, असा आरोप एका आरटीआय कार्यकर्त्याने केला होता.