भावी प्राध्यापकांची रविवारी ‘सेट’! राज्यातील १,२८,२४३ विद्यार्थी देणार २९८ केंद्रांवर परीक्षा; २ तास अगोदर केंद्रांवर उपस्थिती आवश्यक

सोलापूर : प्राध्यापक पदासाठी आवश्यक पात्रता परीक्षा सेट येत्या रविवारी (ता. ७) होणार आहे. त्यासाठी सोलापूर शहरात १५ केंद्रे असून या परीक्षेसाठी जिल्ह्यातील सहा हजार ८८८ विद्यार्थ्यांनी अर्ज केल्याची माहिती सोलापूर सेट परीक्षेचे संपर्क प्रतिनिधी डॉ. विकास घुटे यांनी दिली.

राज्यस्तरीय ‘सेट’साठी राज्यभरातील एक लाख २८ हजार २४३ विद्यार्थ्यांनी नोंदणी केली आहे. महाराष्ट्र व गोवा राज्यातील १७ शहरांमधील २९८ केंद्रांवर ही परीक्षा रविवारी होणार आहे. सोलापूर शहरातील सहा हजार ८८८ विद्यार्थी देखील ही परीक्षा देणार आहेत. ही परीक्षा दोन सत्रात होणार असून पहिल्या सत्रात सकाळी १० ते ११ या वेळेत पेपर-एक व दुसऱ्या सत्रात सकाळी साडेअकरा ते दुपारी दीड या वेळेत दुसरा पेपर होणार आहे. विद्यार्थ्यांना या परीक्षेसाठी दोन तास अगोदर केंद्रांवर उपस्थित राहावे लागणार आहे. परीक्षेसाठी प्रवेशपत्र आवश्यक असून विद्यार्थ्यांनी प्रवेशपत्र सोबत घेवून परीक्षा केंद्रांवर उपस्थित राहावे, असे आवाहन डॉ. घुटे यांनी केले आहे. प्राध्यापक भरतीसाठी विद्यार्थ्यांना ‘सेट’चे दोन्ही पेपर देणे बंधनकारक आहे.

सोलापुरात परीक्षेसाठी ‘ही’ १५ केंद्रे

सोलापूर शहर- जिल्ह्यातील १५ केंद्रांवर विद्यार्थ्यांची सेट परीक्षा होणार आहे. त्यात संगमेश्वर महाविद्यालय, वालचंद कला व शास्त्र महाविद्यालय, हिराचंद नेमचंद कॉमर्स महाविद्यालय, कस्तुरबाई शिक्षणशास्त्र महाविद्यालय, डी. बी. एफ. दयानंद महाविद्यालय, श्री सिद्धेश्वर वुमेन्स पॉलिटेक्निक महाविद्यालय, श्री सिद्धेश्वर वुमेन्स इंजिनिअरिंग महाविद्यालय, सोलापूर सोशल असोसिएशन कला व वाणिज्य महाविद्यालय, एल. बी. पी. महिला महाविद्यालय, एस. बी. नवले सिंहगड इंजिनिअरिंग महाविद्यालय, भारती विद्यापीठ अभिजीत कदम इन्स्टिट्यूट ऑफ मॅनेजमेंट, वालचंद इन्स्टिट्यूट ऑफ टेक्नॉलॉजी, फार्मसी कॉलेज व संगणकशास्त्र संकुल सोलापूर विद्यापीठ या परीक्षा केंद्रांचा समावेश आहे.