'राज्याने प्रत्येक शेतकऱ्याला दहा हजारांचे अनुदान द्यावं'

औरंगाबाद: खतांच्या वाढलेल्या किंमतीविषयी पंतप्रधान नरेंद्र मोदी (pm narendra modi) यांनी तब्बल १४ हजार ७७५ कोटींच्या खत अनुदानाचा ऐतिहासिक निर्णय घेत देशातील कोट्यवधी शेतकऱ्यांना दिलासा दिला. आता राज्य सरकारने शेतकऱ्यांना सुलभतेने खत उपलब्ध होईल याची व्यवस्था करावी. तसेच शेतकऱ्यांना खरीप हंगामातील मशागतीसाठी सरसकट दहा हजार रुपये रोख अनुदान देण्यात यावेत, अशी मागणी आमदार हरिभाऊ बागडे (haribhau bagade) यांनी गुरुवारी (ता.२०) पत्रकाद्वारे केली.

आमदार बागडे म्हणाले, की आंतरराष्ट्रीय बाजारपेठांमध्ये फॉस्फरिक ॲसिड, अमोनियाच्या किंमती वाढल्यामुळे खतांच्या किंमती वाढल्या. याचा फटका देशभरातील शेतकऱ्यांना बसणार हे ओळखून गेल्याच आठवड्यात मोदी सरकारने त्यावर उपाययोजना सुरू केल्या होत्या. हे लक्षात घेऊन कॉंग्रेस-राष्ट्रवादीच्या नेत्यांनी दरवाढ मागे घेण्याची मागणी केली. पण त्याआधीच अनुदानाचा निर्णय झाल्याने त्यांची श्रेयाची संधी हुकली आहे. त्यामुळे आता या नेत्यांनी राज्य सरकारकडे पाठपुरावा करून शेतकऱ्यांना पावसाळापूर्व मशागतीसाठी दहा हजार रुपयांचे सरसकट अनुदान मिळवून द्यावे व प्रत्येक गरजू शेतकऱ्यापर्यंत खत वितरण होईल याची जबाबदारी घ्यावी, असेही आमदार हरिभाऊ बागडे म्हणाले.

शेतकऱ्यांच्या खात्यात २० हजार कोटी जमा
गेल्याच आठवड्यात केंद्र सरकारने देशातील शेतकऱ्यांच्या खात्यात किसान सन्मान योजनेअंतर्गत २० हजार ६६७ कोटींचा निधी जमा केला असून त्याचा सर्वाधिक लाभ महाराष्ट्रातील शेतकऱ्यांना झाला आहे. आता खतांच्या दरवाढीचा बोजा उचलून मोदी सरकारने शेतकऱ्यांवरील भार आणखी हलका केला आहे. आता शेतकऱ्यांना वेळेत, गरजेएवढे खत मिळेल हे पाहण्याची जबाबदारी राज्य सरकारची आहे. राज्यातील शेतकऱ्यांना खरीप हंगामातील शेतीविषयक कामांसाठी दहा हजारांचे अनुदान त्वरित वितरित करावे, पीककर्जासाठी बँकांकडून अडवणूक होणार नाही याची खबरदारी घ्यावी असेही निवेदनाव्दारे म्हटले आहे.