Dhangar Reservation: "मी आधी धनगर नंतर आमदार"; आरक्षणाच्या मुद्द्यावरुन पडळकर आक्रमक

धनगर समाजाचा एसटी प्रवर्गामध्ये समावेश करण्यात यावा, या मागणीसाठी मागच्या कित्येक वर्षांपासून धनगर समाज आंदोलन करीत आहे. १ सप्टेंबर रोजी मराठा आरक्षणाचा वाद पेटल्यानंतर राज्यात मराठा समाजाने आंदोलनाचं हत्यार उपसलं. त्यानंतर ओबीसी समाजानेदेखील अनेक ठिकाणी उपोषणं आणि मोर्चे काढण्यास सुरूवात केली आहे.

अशातच भाजप आमदार गोपीचंद पडळकरांनी भाजप सरकारला इशारा दिला आहे. धनगर आरक्षणाच्या मुद्यावरून पडळकर आक्रमक झाले आहेत. ट्विटरवर(एक्सवर) पडळकरांनी "मी पहिले धनगर नंतर आमदार गोपीचंद पडळकर ! नाद करू नका! यळकोट यळकोट, जय मल्हार!" पोस्ट लिहित भाजपसह सरकारला इशारा दिला आहे.

पडळकरांनी उपमुख्यमंत्री अजित पवार यांच्यावर टीका केल्यानंतर देवेंद्र फडणवीसांसह राष्ट्रवादीचे पदाधिकाऱ्यांनीही नाराजी व्यक्त केली होती. यानंतर पडळकरांनी ट्विटरवर केलेली ही पोस्ट चर्चेत आली आहे. या ट्विटनंतर धनगर समाजाच्या आरक्षणावरून आक्रमक झालेले पडळकर हे आमदारकीचा राजीनामा देण्याच्या विचारात आहेत का ? अशी चर्चा राजकीय वर्तुळात रंगली आहे.

एसटी संवर्गात समावेश करावा, यासाठी धनगर समाजाच्या वतीने अहमदनगरच्या चौंडी येथे उपोषण सुरु आहे. यशवंत सेनेच्या वतीने हे आंदोलन करण्यात येत आहे. दोन आंदोलकर्त्यांची प्रकृती खालावली होती. दोघांनाही अहमदनगरच्या जिल्हा रुग्णालयात हलवण्यात आलेलं होतं. त्यातील अण्णासाहेब रुपनवर या उपोषणकर्त्याची प्रकृती जास्त बिघडल्याने त्यांना पुण्याला हलवण्यात आलेलं आहे. 'एबीपी माझा'ने हे वृत्त दिले आहे.

मागच्या पंधरा दिवसांपासून चौंडीमध्ये हे उपोषण सुरु असून अकराव्या दिवशी मंत्री गिरीश महाजन यांनी आंदोलनकर्त्यांची भेट घेतली होती. दोन दिवसांमध्ये बैठक घेऊन धनगर आरक्षणाच्या बाबतीत निर्णय घेऊ, असं आश्वासन त्यांनी दिलं. मात्र ही मुदत कालच संपलेली आहे.

आज (बुधवारी) खांबाटकी घाटामध्ये रास्ता रोको आंदोलन केलं आहे. राज्यभरात ऐकून २५ ठिकाणी रास्ता रोको होणार आहे. धनगर आरक्षणासाठी आंदोलक आक्रमक झाल्याचं बघायला मिळत आहे. सरकार धनगर आरक्षणाच्या संदर्भाने काय भूमिका घेतं, हे पाहणंही महत्त्वाचं आहे.