राऊतांना न्यायव्यवस्थेवरील टीका भोवणार? बार असोसिएशनची अवमान याचिका

मुंबई : न्यायालयाने किरीट सोमय्यांना दिलासा दिल्यानंतर संजय राऊतांनी (Sanjay Raut) न्यायव्यवस्थेवर टीका केली होती. आता राऊतांना हीच टीका भोवण्याची शक्यता आहे. इंडियन बार असोसिएशनने मुंबई उच्च न्यायालयात (Bombay High Court) संजय राऊतांविरोधात अवमान याचिका (Plea Against Sanjay Raut) दाखल केली आहे. विशेष म्हणजे मुख्यमंत्री उद्धव ठाकरेंसह रश्मी ठाकरे आणि गृहमंत्री दिलीप वळसे पाटील यांनाही नोटीस बजावण्याची मागणी केली आहे.

मुंबई उच्च न्यायालयाने आयएनएस विक्रांत प्रकरणी किरीट सोमय्यांना अटकेपासून दिलासा दिला होता. त्यावेळी न्यायालय भाजप नेत्यांना झुकतं माप देत असल्याची टीका संजय राऊतांनी केली होती. भाजपच्या नेत्यांना लवकरच दिलासा मिळतो. न्यायव्यवस्थेत दिलासा देण्यासाठी भाजपचे लोक बसविण्यात आले आहेत का? की न्यायव्यवस्थेतील लोकांना कुठला फायदा मिळतो? महाविकास आघाडीतील नेत्यांना दिलासा का मिळत नाही? असे सवाल संजय राऊतांनी न्यायव्यवस्थेवर उपस्थित केले होते. त्यानंतर आता इंडियन बार असोसिएशनने संजय राऊतांविरोधात अवमान याचिका दाखल केली आहे.

किरीट सोमय्या आणि भाजप नेत्यांना झुकतं माप देत असल्याचा दावा संजय राऊतांनी केला होता. हे चुकीचे असल्याचा दावा बार असोसिएशनने केला आहे. न्यायव्यवस्थेवर टीका-टीपण्णी करणे योग्य नाही. संजय राऊत खासदार आहेत. त्यामुळे त्यांनी न्यायव्यवस्थेबाबत बोलताना सांभाळून बोलावं, असं याचिकेत म्हटलं आहे. इतकेच नाहीतर सामानाच्या मुख्य संपादक रश्मी ठाकरे, मुख्यमंत्री उद्धव ठाकरे आणि दिलीप वळसे पाटील यांनाही नोटीस बजावून स्पष्टीकरण मागावे, अशी मागणी बार असोसिएशनने याचिकेतून केली आहे. ही याचिका लवकरच सुनावणीसाठी येण्याची शक्यता आहे. याचिकेवर सुनावणी घेताना न्यायालय काय भूमिका घेतेय? हे पाहणे महत्वाचे आहे.