मी माफी मागण्याशिवाय काही करू शकत नाही - जितेंद्र आव्हाड

मुंबई : पेपर फोडणे हा गोपनियतेचा भंग आहे. त्यामुळे मी व्यथित आहे. मी देखील महाराष्ट्र लोकसेवा आयोगाच्या (MPSC) परीक्षा दिल्या आहेत. पण परीक्षा घेण्याची पहिली वेळ होती. आता फटका बसला. पण, यानंतर मात्र काळजी घेणार आहे. मी माफी मागण्याशिवाय काही करू शकत नाही. पण मी जबाबदारी घेतोय, असं गृहनिर्माणमंत्री जितेंद्र आव्हाड (Maharashtra Minister Jitendra Awhad) म्हणाले.

म्हाडाचा पेपर फोडण्याचा प्रयत्न झाला होता. त्यामुळे ऐनवेळी म्हाडाची परीक्षा रद्द करण्यात आली. जितेंद्र आव्हाड यांनी मध्यरात्री २ वाजता ट्विटरवर एक व्हिडिओ जारी करत परीक्षा पुढे ढकलल्याचे सांगितले. तसेच त्यांनी विद्यार्थ्यांची माफी देखील मागितली होती. पण, आधीच परीक्षा केंद्रावर पोहोचलेल्या विद्यार्थ्यांनी रोष व्यक्त केला होता. अनेक विद्यार्थ्यांनी निदर्शने देखील केली. यापूर्वी देखील आरोग्य विभागाच्या परीक्षा ऐनवेळी रद्द करण्यात आल्या होत्या. त्यामुळे सरकार परीक्षा घेण्यात वारंवार अपयशी का ठरतं? असा प्रश्न उपस्थित केला जात आहे.

म्हाडानं लक्ष ठेवल्यामुळे प्लॅन बी यशस्वी झाला नाही - आव्हाड

पेपर फोडण्याचा प्लॅन ए होता. पण, पेपर फुटला नाही. कारण त्यावर आमचा दबाव होता. पेपर फुटला तर प्रीतेश देशमुख जबाबदार असेल हे स्पष्ट केलं होतं. त्यानंतर त्यांनी प्लॅन बी केला होता. म्हणजेच परीक्षेनंतर ज्या विद्यार्थ्यांबरोबर व्यवहार झाला होता त्यांचे गुण वाढवून देण्याचा प्लॅन होता. पण, म्हाडाने लक्ष ठेवल्यामुळे प्लॅन बी देखील यशस्वी झाला नाही. त्यामुळे परीक्षा रद्द करण्यात आली. त्याबाबत TCS ला संपर्क केला आहे. याबाबत ६० दिवसात प्रक्रिया पूर्ण करणार आहे, असंही आव्हाडांनी सांगितलं.