Eknath Khadse: "वडीलकीच्या नात्याने सांगतो..."; राष्ट्रवादीच्या मेळाव्यातूनच खडसेंचा आव्हाडांना घरचा आहेर

Eknath Khadse: राष्ट्रवादी काँग्रेस शरद पवार गटाचे शिर्डी येथील शिबीराचा आज समारोप आहे. काल आमदार जितेंद्र आव्हाड यांनी श्रीराम यांच्याबाबत वादग्रस्त विधान केले होते. त्यामुळे कालचा दिवस चांगलाच गाजला. जितेंद्र आव्हाड यांनी राम आमचा आणि तो बहुजन असल्याचं वादग्रस्त विधान केलं. राम शाकाहारी नव्हता तर मांसाहारी होता. ते शिकार करून खायचे. त्यांच्या वक्तव्याबाबत राज्यात सत्ताधारी आक्रमक झाले आहेत.

दरम्यान जितेंद्र आव्हाड यांनी आता पक्षातील नेत्यांच्या टिकेचा देखील सामना करावा लागत आहेत. रोहित पवार यांच्यानंतर एकनाथ खडसे यांनी आव्हाडांना सल्ला दिला आहे. एकनाथ खडसे आज राष्ट्रवादीच्या शिबिरात बोलत होते.

एकनाथ खडसे म्हणाले, जितेंद्र आव्हाडांना वडीलकीच्या नात्याने सांगतो. त्यांनी अशी वक्तव्य करु नये. निवडणुकीच्या तोंडावर त्यांनी अशी वक्तव्य टाळावी.

जितेंद्रने काल विषय सांगितला की श्रीराम मांसाहारी होते. त्यांचे ते व्यक्तिगत मत असू शकते. ते पक्षाचे मत असेल असं मला वाटत नाही. ज्या ठिकाणी श्रद्धेचा, भावनेचा विषय असतो, यापेक्षा महत्वाचे म्हणजे समोर निवडणुका असताना तर असे वादग्रस्त वक्तव्य टाळावे, असे मी त्यांना वडीलकीच्या नात्याने सल्ला देतो. तो माझा अधिकार असल्याचे एकनाथ खडसे म्हणाले.

निवडणुका जिंकण्यासाठी संघटनेचे बळ हे लागत-

एकनाथ खडसे म्हणाले, "आतापर्यंत भाषण केलेल्या वक्त्यांनी आपल्यामध्ये ताकद निर्माण करून आपले सरकार निर्माण होईल असे जोशदायक वातावरण निर्माण केले आहे. आता पुढच्या महिन्यात कदाचित निवडणुकांची आचारसंहिता लागेल निवडणुका या वाऱ्यावर जिंकता येत नाही. निवडणुका जिंकण्यासाठी संघटनेचे बळ हे लागतेच. संघटनेमध्ये कार्यकर्ता तयार झाल्यानंतर, सभासद नोंदणी, पक्षाचा सदस्य, सक्रिय सदस्य असेल तर कार्यकर्ता असा असला पाहिजे की, त्याला कोणत्याही आदेशाची वाट न पाहता काम करण्याची क्रिया केली गेली पाहिजे."