'चारशे कोटींचा घोटाळा; तीन नेते, तीन अधिकाऱ्यांसह पाच...', सोमय्यांचा आरोप

मुंबई : आयकर विभागाने मुंबई महापालिका (BMC) निवडणुकीच्या तोंडावर शिवसेना नेते यशवंत जाधव (Yashwant Jadhav Income Tax Raid) यांच्या घरावर छापेमारी केली होती. त्यांच्या घरातून दोन कोटी रुपये जप्त करण्यात आले होते. याप्रकरणी भाजप नेते किरीट सोमय्या (Kirit Somaiya) यांनी नवीन आरोप केले असून हा चारशे कोटी रुपयांचा घोटाळा असल्याचं सोमय्या म्हणाले.

यशवंत जाधव यांनी कंत्राटदारांना कंत्राट देताना घोटाळा केल्याचा आरोप किरीट सोमय्यांनी केला आहे. हा चारशे कोटी रुपयांचा घोटाळा असून यामध्ये तीन नेत्यांचा समावेश आहे. इतकेच नाहीतर मुंबई महापालिकेच्या तीन अधिकाऱ्यांसह ५ कंत्राटदार देखील या घोटाळ्यात सहभागी आहेत, असे आरोप किरीट सोमय्यांनी केले आहेत.

अचानक यशवंत जाधवांच्या घरावर छापेमारी -

यशवंत जाधव हे मुंबई महापालिकेच्या स्थायी समितीचे अध्यक्ष आहेत. तसेच ते महापालिकेतील सेनेचा मोठा चेहरा देखील आहेत. त्यांच्या घरावर २५ फेब्रुवारीला सकाळीच ७ वाजता आयकर विभागाने छापेमारी केली. ही कारवाई सलग पाच दिवस चालली. आयकर विभागानं घराची झडती घेतली असता त्यांच्या दोन कोटी रुपये आढळून आले. तसेच आयकर विभाग एका हवाला एजंटचा तपास करत असताना त्याच्या मार्फत 15 कोटी रूपये काही रोख रक्कम आणि चेक स्वरूपात जाधव कुटुंबियांकडे आल्याचे दिसून आले. या उत्पन्नाची माहिती ही जाधव कुटुंबियांनी लपवली आणि त्यावर कर चुकवला नाही असा आयकर विभागाला संशय आहे.