Koyna Dam : कोयना धरण क्षेत्रात जोरदार पाऊस; महाबळेश्‍वरला 157 मिलिमीटर पावसाची नोंद

पाटण : कोयना धरण (Koyna Dam) पाणलोट क्षेत्रात पावसाचा जोर वाढला असून, महाबळेश्‍वरला १५७ (Mahabaleshwar) मिलिमीटर पावसाची नोंद झाली आहे. एका दिवसात जलाशयाची पाणीपातळी चार फुटाने वाढली असून, पाणीसाठा दीड टीएमसी वाढला आहे.

पाणलोट क्षेत्रातील महाबळेश्‍वरनंतर नवजाच्या पावसाने एक हजार मिलिमीटर पावसाचा टप्पा पार केला असून, कोयनानगर (Koynanagar) येथे एकूण फक्त ७३० मिलिमीटर पावसाची नोंद आजपर्यंत झालेली आहे. संततधार पाऊस सुरू झाल्याने कोयना विभागासह तालुक्याच्या पश्चिम भागात भात व नाचणी पुनर्लागणीच्या कामाकडे वळला आहे.

गुरुवारी रात्रीपासून कोयना धरण पाणलोट क्षेत्रात संततधार पाऊस सुरू झाला व आज दिवसभर मुसळधार पाऊस कोसळत होता. पूर्व भागातही पावसाच्या चांगल्या सरी येऊ लागल्या आहेत. गेल्या २४ तासांत कोयनानगर येथे ७७ मिलिमीटर, नवजाला ११२ मिलिमीटर आणि महाबळेश्‍वरला सर्वांत जास्त १५७ मिलिमीटर पावसाची नोंद झाली आहे.

जलाशयात प्रतिसेकंद १७ हजार २४० क्युसेक पाण्याची आवक होत आहे. धरणाची पाणीपातळी २०४९.११ फूट झाली असून, एकूण पाणीसाठा १७.७० टीएमसी झाला आहे. गेल्या २४ तासांत पाणीपातळी चार फुटाने वाढली असून, पाणीसाठ्यात दीड टीएमसी वाढ झाली आहे. एक महिना मॉन्सूनचा पाऊस उशिरा दाखल झाला असून, या जलवर्षात पाणीसाठ्यात दीड टीएमसीने झालेली वाढ समाधानकारक आहे.