Sharad Pawar: शरद पवार गट आक्रमक; विधानपरिषदेत आमदार अपात्रतेसाठी 2 अर्ज दाखल

मुंबई- विधानपरिषदेत राष्ट्रवादीच्या आमदार अपात्रतेसाठी शरद पवार गडाकडून 2 अर्ज दाखल करण्यात आले आहेत. त्यामुळे विधानपरिषदेच्या आमदारांना अपात्र ठरवण्यासाठीही हालचाली सुरु झाल्याचं दिसतंय. विधानपरिषदेच्या उपसभापती निलम गोऱ्हे यांना दोन अर्ज करण्यात आले आहेत. राष्ट्रवादी प्रदेशाध्यक्ष जयंत पाटील आणि पक्षाचे सरचिटणीस जितेंद्र आव्हाड यांनी अर्ज केले आहेत.

जयंत पाटील यांनी केलेल्या अर्जात आमदार विक्रम काळे, अमोल मिटकरी, सतिश चव्हाण, अनिकेत तटकरे यांचा उल्लेख आहे. तर जितेंद्र आव्हाड यांच्या अर्जामध्ये रामराजे निंबाळकर यांच्या नावाचा उल्लेख आहे.

अजित पवार गटाविरोधात आमदारांच्या यादीमध्ये ४१ विधानसभेचे आमदार आणि विधानपरिषदेचे ५ आमदार अशी नोटिस देण्यात आली आहे. जे नेते तटस्थ राहिले होते, त्यांच्याविरोधातही ही नोटिस देण्यात आली आहे. त्यामुळे शरद पवार गट आक्रमक झाल्याचं पाहायला मिळत आहे.

शरद पवार गटामध्ये ४१ आमदार राहिल्याचं स्पष्ट होत आहे. नवाब मलिक यांनी आपली भूमिका स्पष्ट केली नाही, त्यामुळे ते तटस्थ आहेत. ९ मंत्री आणि इतर सर्व आमदार यांचा या नोटिसीमध्ये समावेश आहे. हे सर्व नेते अजित पवारांचे निकटवर्तीय म्हणून ओळखले जात होते. पण, नरहरी झिरवळ, चेतन तुपे, अतुल बेनके यांनाही शरद पवार गटाकडून नोटिस पाठवण्यात आली आहे.

आमदार अपात्रतेच्या प्रत्यक्ष सुनावणीची तारीख ठरली आहे. शिवसेना शिंदे गटाच्या ४० आमदारांची आणि ठाकरे गटाच्या १४ आमदारांची ही सुनावणी १४ सप्टेंबर रोजी होणार आहे. शिवसेनेच्या दोन्ही गटाकडून नोटिसा पाठवण्यात आल्या होत्या. त्यानंतर हे प्रकरण सुप्रीम कोर्टात गेलं होतं. सुप्रीम कोर्टाने यासंदर्भात अधिकार विधानसभा अध्यक्षांकडे असल्याचं स्पष्ट केलं होतं. आता एकाच दिवशी दोन्ही गटांची सुनावणी होणार आहे.

शरद पवार गटातील आमदार पुढील प्रमाणे

जयंत पाटील, जितेंद्र आव्हाड, रोहित पवार, सुमन पाटील, अशोक पवार, सुनील भुसारा, प्राजक्त तनपुरे, बाळासाहेब पाटील, अनिल देशमुख, संदीप क्षिरसागर, राजेश टोपे यांचा समावेश शरद पवार गटाच्या आमदारांमध्ये करण्यात आला आहे. (Latest Marathi News)