Loksabha Bypoll: पुणे व चंद्रपूरमध्ये पोटनिवडणूक कधी? मे महिन्यापासून दोन्ही मतदारसंघात खासदार नाही

नवी दिल्ली: पुणे व चंद्रपूरसह देशातील चार लोकसभा मतदारसंघाच्या पोटनिवडणुका होण्याची शक्यता आता मावळली आहे. राज्यातील या दोन मतदारसंघातील मतदार जवळपास एक वर्ष लोकसभा मतदारसंघ हे खासदाराशिवाय राहणार आहेत.

सध्या देशात चार लोकसभा मतदारसंघ रिक्त आहेत. यात उत्तरप्रदेशातील अंबालाचे भाजपचे खासदार रतनलाल कटारिया यांचे २९ मार्च २०२३ रोजी निधन झाले. तेव्हापासून या मतदारसंघात खासदार नाही. उत्तरप्रदेशातील गाझीपूरचे समाजवादी पक्षाचे खासदार अफजल अंसारी यांना दोन वर्षांपेक्षा अधिक काळासाठी शिक्षा झाल्याने त्यांचे सदस्यत्व रद्द झाले आहे. (latest marathi news)

या मतदारसंघातही गेल्या १ मे पासून निवडणूक झालेली नाही. अफजल अंसारी यांनी भाजपचे नेते व सध्या जम्मू व काश्मीरचे नायब राज्यपाल मनोज सिन्हा यांचा पराभव केला होता. १८ मे रोजी पुण्याचे भाजपचे खासदार गिरीश बापट यांचे निधन झाले तर चंद्रपूरचे काँग्रेसचे खासदार बाळूभाऊ धानोरकर यांचे ३० मे रोजी निधन झाले आहे. या दोन्ही मतदारसंघाची पोटनिवडणूक शक्यता वर्तविली जात होती. काही जणांनी तयारीही सुरू केली होती.

परंतु निवडणूक आयोगाकडून कोणतेही संकेत न मिळाल्याने ही तयारी आता थंडबस्त्यात पडली आहे. लोकसभेच्या सार्वत्रिक निवडणुकीला सहा महिन्यापेक्षा अधिक काळ असला तर केंद्रीय निवडणूक आयोगाने पोटनिवडणुका जाहीर करणे अपेक्षित आहे. विविध राज्यांच्या सात विधानसभा मतदारसंघाच्या पोटनिवडणुका जाहीर करण्यात आल्या. (Pune Latest News)

मात्र त्यावेळीही या लोकसभेच्या पोटनिवडणुका जाहीर न केल्याने आता या निवडणुका जाहीर होण्याची शक्यता मावळली आहे. या मतदारसंघातील मतदारांना आता नव्या खासदारासाठी पुन्हा सात ते आठ महिने वाट पाहावी लागणार आहे.