शिंदे-फडणवीस सरकारचा खातेवाटपाचा मुहूर्त कधी ?

शिंदे-फडणवीस सरकारचा बहुप्रतिक्षीत मंत्रिमंडळ विस्तार अखेर ४० दिवसांनी पार पडला. मंत्रिमंडळ विस्तारानंतर आता सर्वांना खातेवाटपाची उत्सुकता लागली आहे. दरम्यान, मिळालेल्या माहितीनुसार, खातेवाटपावर दिल्लीतूनच शिक्कामोर्तब होणार असून १५ ऑगस्ट नंतरच खातेवाटपाला मुहूर्त मिळणार आहे.(maharashtra cabinet allocation might eknath shinde devendra fadnavis)

मंगळवारी शिंदे-फडणवीस सरकारच्या १८ आमदारांचा मंत्रिमंडळ विस्ताराचा शपथविधी पार पडला. त्यामुळे तब्बल ४० दिवसांहून अधिक दिवस रखडलेल्या मंत्रिमंडळ विस्ताराबाबतच्या तर्क-वितर्कांना पूर्णविराम लागला. दुसरीकडे मात्र शिंदे गटात सामील झालेल्या काही आमदारांची मंत्रिपदी वर्णी न लागल्याने नाराजीनाट्य सुरु झाले आहे.

कुणाला कुठलं खातं द्यायचा आणि कुठला बंगला द्यायचा याचा निर्णय मुख्यमंत्री आणि उपमुख्यमंत्री एकत्र बसून घेणार आहेत. खाते वाटप आणि बंगले वाटप करताना मंत्र्यांची नाराजी होऊ नये यासाठी शिंदे आणि फडणवीस यांचा प्रयत्न असेल.

आतापर्यंत समोर आलेल्या माहितीनुसार, मुख्यमंत्रिपद स्वतः शिंदे यांच्याकडे असल्याने महत्त्वाची खाती भाजपकडे दिली जाणार असून उपमुख्यमंत्री देवेंद्र फडणवीस यांच्याकडे वित्त तसेच गृह खाते दिले जाण्याची शक्यता आहे. याशिवाय, भाजपच्या प्रमुख नेत्यांकडे महसूल, जलसंपदा, ग्रामविकास आणि सार्वजनिक बांधकाम अशी खाती जाण्याची शक्यता राजकीय वर्तुळात वर्तवण्यात येत आहे.

राज्यात शिंदे-फडणवीस मंत्रिमंडळ विस्तार मंगळवारी पार पडला. परंतु, खातेवाटपावरुन अजूनही राज्य सरकारमध्ये गोंधळ असल्याचं चित्र आहे. यावरुन विरोधक शिंदे सरकारवर मिश्किल टीपण्णी करत आहेत. विधानसभेचे विरोधी पक्षनेते अजित पवार यांनीही टोला सरकारला टोला लगावला आहे. दिल्लीतून शिंदे-फडणवीस सरकारला अजूनही सिग्नल मिळालेलं दिसत नाही, असं म्हणत पवार यांनी राज्य सरकारला टोला हाणला आहे.