Cow Milk Rate: दूध उत्पादक शेतकऱ्यांना दिलासा; प्रतिलिटर 35 रुपये दर जाहीर

मुंबई : आंतरराष्ट्रीय बाजारात दूध भुकटी आणि बटरचे दर कमी झाल्याने राज्यातील दूध खरेदी दरावर परिणाम झाला होता. यामुळे दूध उत्पादक शेतकऱ्यांना दिलासा मिळावा, यासाठी दुधाला प्रतिलिटर ३० रुपये स्थायीभाव आणि सरकारकडून पाच रुपये अनुदान देण्याचा निर्णय सरकारने घेतला आहे. दुधाचे नवीन दर १ जुलै पासून लागू असणार आहेत. याबाबतचे निवेदन पशुसंवर्धन व दुग्ध व्यवसाय विकास मंत्री राधाकृष्ण विखे पाटील यांनी विधानसभेत केले. (Maharashtra Cow Milk Rate relief for milk producing farmers 35 per liter rate announced)

विखे म्हणाले, ‘‘राज्यभरातील सहकारी तथा खासगी दूध उत्पादक संघ, आणि दूध उत्पादक शेतकरी यांची तातडीची बैठक घेऊन दूध उत्पादक शेतकरी, आणि दूध संघाच्या समस्या जाणून घेतल्या. राज्यातील सर्व खासगी तथा सहकारी दूध संघाने शेतकऱ्यांना प्रतिलिटर ३० रुपये भाव देण्याचे सर्वानुमते ठरले. तसेच पाच रुपये प्रतिलिटरचे अनुदान दूध उत्पादक शेतकऱ्यांच्या खात्यात सरकार वर्ग करेल. त्यामुळे प्रतिलिटर ३५ रुपये मिळून शेतकऱ्यांना दिलासा मिळेल.’’

मर्यादा १५० हजार टनांसाठी

‘‘गेल्या काही दिवसांपासून आंतरराष्ट्रीय बाजारात दूध भुकटी आणि बटरची मागणी कमी झाल्याने दर घसरत आहेत. यामुळे राज्यात दूध भुकटीचा मोठा साठा शिल्लक आहे. राज्यातील जे दूध प्रकल्प भुकटी निर्यात करतात त्यांना प्रोत्साहन म्हणून प्रतिकिलोसाठी ३० रुपये अनुदान देण्याचा निर्णय घेतला आहे. अनुदानाची ही मर्यादा १५० हजार टनासाठी असेल,’’ असे विखे पाटील यांनी सांगितले.