मुंबई: महाराष्ट्र राज्याने कोविड-19 लसीकरणात एक कोटींचा टप्पा पार केला असून भारतातील इतर राज्यांच्या तुलनेत आजही महाराष्ट्र राज्य लसीकरणात पहिल्या क्रमाकांवर आहे. राज्याचे आरोग्य सचिव डॉ. प्रदीप व्यास यांनी दिलेल्या माहितीनुसार, महाराष्ट्र लसीकरणात अव्वल असून इतर देशांच्या तुलनेत राज्यात आतापर्यंत सर्वाधिक लसीकरण झाले आहे. आज, 11 एप्रिलला दुपारी 12.30 च्या सुमारास राज्यात 1 कोटी 38 हजार 421 लोकांचे लसीकरण करण्यात आले. दरम्यान, महाराष्ट्राला इतर राज्यांच्या तुलनेत सर्वात कमी लसींचे डोस मिळाले आहेत. तरीही राज्याने एवढा मोठा लसीकरणाचा टप्पा गाठला असल्याचे त्यांनी सांगितले.
11 एप्रिलला सकाळी सात वाजेपर्यंत 99 लाख 23 हजार 534 एवढ्या लोकांचे लसीकरण करण्यात आले होते. मात्र, 12.30 च्या सुमारास हा आकडा एक कोटींच्या पार गेला. यापैकी 89 लाख 70 हजार 148 लोकांना पहिला डोस तर 9 लाख 53 हजार 386 लोकांना दुसरा डोस देण्यात आला आहे. लसीकरणाचा वेग जरी वाढत असला, तरी इतर राज्यांच्या तुलनेत महाराष्ट्रात रुग्णवाढीचे प्रमाण जास्त आहे. त्यामुळे, कोरोनाचा वाढता प्रसार रोखायचा असेल, तर जास्तीच जास्त लसीकरण वाढवण्याची गरज वैद्यकीय तज्ज्ञांनी व्यक्त केली आहे.
राज्यात जरी रुग्णसंख्या वाढत असली, तरी त्याच तुलनेत लसीकरणाचे काम केले जात आहे. त्यामुळे देशातील इतर राज्यांच्या तुलनेत महाराष्ट्रात आतापर्यंत लसीकरण मोठ्या प्रमाणात केले गेले.
- राज्याचे लसीकरण विभागाचे प्रमुख डॉ. दिलीप पाटील
राज्यात दर दिवशी चार लाख लोकांचे लसीकरण होत आहे. हा टप्पा पुढील काही दिवसांत सहा लाखांपर्यंत न्यायचा आहे. पण, सध्याची परिस्थिती पाहता कोविड 19 लसींचा राज्यात तुटवडा भासत आहे. त्यामुळे, 10 एप्रिल या दिवशी लसीच्या तुटवड्यामुळे दिवसभरात 2 लाख 82 हजार 944 एवढेच लसीकरण केले गेले. त्यामुळे, जर जास्तीत जास्त लसीकरणाचा टप्पा गाठायचा असेल, तर राज्याला दर आठवड्याला किमान 40 लाख डोसची गरज असल्याचे राज्याचे आरोग्यमंत्री राजेश टोपे यांनी आधीच स्पष्ट केले आहे.
| राज्य | लसीकरण |
| महाराष्ट्र | 1 कोटी 38 हजार 421 |
| गुजरात | 90 लाख 56 हजार 842 |
| कर्नाटक | 60 लाख 67 हजार 099 |
| मध्यप्रदेश | 54 लाख 65 हजार 121 |
| केरळ | 47 लाख 63 हजार 853 |
| बिहार | 44 लाख 94 हजार 404 |
| छत्तीसगढ | 41 लाख 28 हजार 448 |
| आंध्रप्रदेश | 38 लाख 06 हजार 708 |
| हरयाणा | 22 लाख 83 हजार 954 |
| दिल्ली | 20 लाख 62 हजार 711 |
देशात कोरोना प्रतिबंधात्मक लसीकरणात महाराष्ट्र सातत्याने प्रथम क्रमांकावर असून आज राज्याने विक्रमी नोंद केली. आतापर्यंत सुमारे 1 कोटींहून अधिक नागरिकांना लस देण्यात आली. आतापर्यंत 1 कोटी 38 हजार 421 जणांना लस देण्यात आली असून सायंकाळपर्यंत या आकडेवारीत अजून वाढ होईल, असे आरोग्य विभागाचे प्रधान सचिव डॉ. प्रदीप व्यास यांनी सांगितले. या विक्रमी कामगिरीबद्दल मुख्यमंत्री उद्धव ठाकरे, आरोग्यमंत्री राजेश टोपे यांनी यंत्रणेचे कौतुक केले.
(संपादन- विराज भागवत)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.