MLC Election: शिंदे गटाच्या नेत्यावर गोळीबार करणारे भाजप आमदार विधान परिषदेच्या मतदानासाठी येणार तुरूंगाबाहेर

काही महिन्यांपूर्वी उल्हासनगर पोलीस स्टोशनमध्ये भाजप आमदार गणपत गायकवाड यांनी एकनाथ शिंदे यांच्या शिवसेनेचे पदाधिकारी महेश गायकवाड यांच्यावर गोळीबार केला होता. तेव्हापासून तुरूंगात असलेले गणपत गायकवाड आता विधान परिषद निवडणुकीच्या मतदानासाठी तुरूंगाबाहेर येणार आहेत.

विधान परिषद निवडणुकीत मतदान करता यावे यासाठी गायकवाड यांनी कल्याण अतिरिक्त जिल्हा न्यायालयाला विनंती अर्ज केला होता, तो मान्य करण्यात आला आहे.

न्यायालयाने दिलेल्या परवानगीनुसार आमदार गणपत गायकवाड आज सकाळी ९ वाजता तळोजा जेल मधून निघणार आहे. यावेळी त्यांना मोठ्या पोलिस बंदोबस्तात विधान भवनात आणले जाणार आहे. सकाळी ९ ते ४ वाजेपर्यंत विधिमंडळ कामकाजासाठी ते तुरूंगाबाहेर असणार आहे. दरम्यान या निवडणुकीत आमदार गणपत गायकवाड कोणाला मतदान करणार याकडे सर्वांचे लक्ष लागले आहे.

राज्यात आत विधान परिषदेच्या 11 जागांसाठी आज मतदान होत आहे. यासाठी 12 उमेदवार मैदानात असल्याने निवडणुकीची रंगत वाढली आहे. अशात आपल्या उमेदवाराशी कोणता दगा फटका होऊ नये यासाठी प्रत्येक पक्ष काळजी घेत आहे. यासाठी सर्वच पक्षांनी आपल्या आमदारांना हॉटेलमध्ये ठेवले आहे.

या निवडणुकीसाठी आज सकाळी 9 ते 4 या दरम्यान मतदान होणार असून, त्यानंतर मतमोजणी प्रक्रिया सुरू होणार आहे.

कोण आहेत गणपत गायकवाड?

फेब्रुवारीच्या सुरुवातीला भाजप आमदार गणपत गायकवाड यांनी मुख्यमंत्री शिंदे यांच्या पक्षाचे नेते महेश गायकवाड यांच्यावर उल्हासनगरमधील हिल लाईन पोलिस स्टेशनच्या वरिष्ठ निरीक्षकांच्या कार्यालयात गोळ्या झाडल्या होत्या. यामध्ये महेश गायकवाड गंभीर जखमी झाले होते. त्यानंतर या प्रकरणात भाजप आमदारासह अन्य आरोपींना अटक करण्यात आली आहे. तेव्हापासून आमदार गायकवाड तळोजा कारागृहात आहेत. गणपत गायकवाड हे कल्याण पूर्व विधानसभा मतदार संघाचे आमदार आहेत.