राज्यात २२ ऑगस्टपासून पावसाचं प्रमाण कमी होण्याची शक्यता

मुंबई : गेल्या काही दिवसांपासून दडी मारून बसलेला पाऊस तीन दिवसांपासून सक्रीय झाला आहे. अनेक ठिकाणी मुसळधार पावसाने हजेरी देखील लावली. मात्र, आता राज्यात 22 ऑगस्ट म्हणजेच उद्यापासून पावसाचे प्रमाण कमी होण्याचा अंदाज हवामान विभागाने (Meteorological Department) वर्तविला आहे.

गेल्या पंधरा ते वीस दिवसांपासून पावसाने खंड दिला होता. यामुळे खरिपातील पिकांची वाढ खुंटली होती, तर हलक्या जमिनीतील पिके माना टाकून सुकुन गेले होते. यामुळे शेतकऱ्यांच्या तोंडचे पाणी पळाले होते. शेतीतील आंतरमशागतीची कामे पूर्ण करून शेतकऱ्यांचे डोळे आभाळाकडे लागले होते. पाऊस नसल्याने तो चिंतेत होता. गेल्या आठ दिवसांपासून उन्हाची तीव्रता वाढली होती. अंगाची लाही-लाही होत होती. पण, गेल्या चार दिवसांपासून पाऊस आणखी सक्रीय झाला होता. राज्यातील अनेक भागात मुसळधार पाऊस कोसळला. तसेच नदी-नाल्यांना पूर देखील आला होता. मात्र, आता उद्यापासून पावसाचा जोर कमी होणार असल्याचा अंदाज हवामान विभागाने व्यक्त केला आहे.

यंदा 'या' भागात सरासरीपेक्षा कमी पाऊस

आतापर्यंत राज्यातील नंदुरबार, अमरावती, गोंदिया, गडचिरोली या भागात सरासरीपेक्षा कमी पाऊस झाला आहे. तसेच अन्य भागात सरासरी इतका किंवा त्यापेक्षा जास्त पाऊस पडला असल्याचे हवामान विभागाने सांगितले.