Maratha Reservation : मनोज जरांगे पुन्हा मैदानात! आजपासून अंतरवालीत सुरू करणार बेमुदत उपोषण

वडीगोद्री (ता.अंबड, जि.जालना) : मराठा समाजाच्या आरक्षणाबाबत शासनाने कुणबी प्रमाणत्र देताना सगेसोयऱ्यांचाही समावेश करावा, तसा कायदा मंजूर करावा, मराठा आरक्षणासाठी विधिमंडळाचे अधिवेशन त्वरित घ्यावे, आरक्षण अधिसूचना व मसुद्याची अंमलबजावणी करावी आदी मागण्यांसाठी मनोज जरांगे पाटील हे शनिवारपासून (ता. १०) अंतरवाली सराटी (ता. अंबड) येथे समाजबांधवांची बैठक घेऊन बेमुदत उपोषणाला सुरवात करणार आहेत. (Maratha Reservation Latest News)

मुंबईला आंदोलन करण्याचा इशारा दिल्यानंतर मनोज जरांगे यांनी समाजबांधवांसह २० जानेवारीला मुंबईकडे कूच केली होती. वाशी येथे आंदोलक पोचताच मुख्यमंत्री एकनाथ शिंदे यांनी त्यांच्याशी चर्चा केली. सगेसोयऱ्यांच्या समावेशासह विविध मागण्या मान्य करीत काही अधिसूचनेचे मसुदे दिले होते. त्यानंतर तेथेच हे आंदोलन स्थगित केले होते.

मात्र विधिमंडळाचे विशेष अधिवेशन घेऊन अधिसूचनेचे कायद्यात रुपांतर करावे, तसे न झाल्यास दहा फेब्रुवारीपासून पुन्हा उपोषणाला बसण्याचा इशारा त्यांनी दिला होता. दरम्यान, अंतरवाली सराटीसह राज्यातील मराठा आंदोलकांवरील दाखल गुन्हे मागे घ्यावेत, या मागणीसाठी अंतरवालीतील शिष्टमंडळाने अंबडचे उपविभागीय पोलिस अधिकारी विशाल खांबे यांच्यासोबत चर्चा करून निवेदन दिले.