Manoj Jarange Patil : 'ओबीसींची मोट बांधण्याच्या भानगडीत पडू नका...'; जरांगेंचे शिंदे-फडणवीसांना आवाहन

राज्यात सध्या मराठा विरूद्ध ओबीसी आरक्षणाचा वाद चांगलाच पेटताना दिसत आहे. मराठा आरक्षणासाठी लढा देणारे मनोज जरांगे पाटील यांच्या मागण्यांनी जोर धरल्यानंतर दुसऱ्या बाजूने राज्यामध्ये ओबीसी समाजाचं एक आंदोलन उभं राहीले आहे. राज्याच्या मागासवर्ग आयोगामध्ये काम केलेले आयोगाचे माजी सदस्य लक्ष्मण हाके यांनी जालन्यातल्या वडीगोद्री येथे उपोषणाला सुरूवात केली होती. यानंतर राज्यात सध्या मराठा विरुद्ध ओबीसा असा आरक्षणाचा वाद पेटला आहे.

यादरम्यान आज ओबीसी आरक्षण बचावासाठी मागच्या दहा दिवसांपासून उपोषणाला बसलेले लक्ष्मण हाके यांनी आपलं आंदोलन स्थगित केलं आहे. यावेळी सरकारने आपल्या दोन मागण्या मान्य केल्याचे हाके म्हणाले. यामुळे सरकारकडून दोन्ही नेत्यांच्या मागण्या पूर्ण करण्यासाठी प्रयत्न होत आहेत. यादरम्यान मराठा समाजाचे नेते मनोज जरांगे यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी ओबीसींची मोट बांधण्याच्या भानगडीत पडू नये असा इशारा दिला आहे.

मुख्यमंत्री एकनाथ शिंदे आणि देवेंद्र फडणवीस साहेब तुम्हाला जाहीर सांगतो. ओबीसींची मोट बांधण्याच्या भानगडीत पडू नका. ओबीसीची मोट बांधू म्हणून पाठबळ द्याल आणि मराठ्यांवर अन्याय कराल.... तर तुम्हाला जाहीर सांगतो मराठ्यांशिवाय राज्यात पानही हलू शकत नाही, असे जरांगे पाटील म्हणाले.

तुम्ही आम्हाला आणि त्यांनाही चुचकाराल आणि मराठ्यांचा घात कराल. अंधारातून त्यांना पाठबळ द्याल, आमच्या अंगावर त्यांना घालाल आणि ओबीसींची मोट बांधयाचा तुमचा डाव असेल तर मनोज जरांगे तो यशस्वी होऊ देणार नाही. मराठ्यांवर जर १३ तारखेपर्यंत अन्याय झाला तर सर्व मराठे एका बाजूने आहेत. तुमच्या पक्षातील देखील मराठ्यांचे नेते देखील अन्याय आता सहन करू शकत नाहीत.

तुमच्या पक्षातील मराठा नेत्यांनी डोळ्यांसमोर होणार इतका अन्याय पाहूण देखील ते तुमच्यासोबत राहिले तर त्यांच्या पाठिमागील एकही मराठा त्यांच्यासोबत राहाणार आहे. जात वाचवणं ही भाजपमधील मराठ्यांची देखील जबाबदारी आहे.

फडणवीस साहेब तुम्ही तो डाव टाकू नका. मी हात जोडून सांगतो. ओबीसींची मोट बांधण्याच्या नादात तुम्ही त्यांना पाठबळ पुरवाल. कारण असं यापूर्वी घडलंय, असेही मनोज जरांगे यावेळी म्हणाले.