Maratha Reservation : मनोज जरांगेंच्या पाठीमागे राजकीय शक्ती उभी; OBC नेते प्रकाश शेंडगेंचा गंभीर आरोप

परभणी : मनोज जरांगे पाटील (Manoj Jarange Patil) यांच्या पाठीमागे कुठली तरी राजकीय शक्ती उभी असल्याची शक्यता नाकारता येत नाही. पण, आगामी काळात निश्चित त्यांच्या मागे कोणाचा राजकीय वरदहस्त आहे हे पुढे आल्याशिवाय राहणार नाही, असे मत ओबीसीचे नेते प्रकाश शेंडगे (OBC leader Prakash Shendge) यांनी व्यक्त केले.

येथील माजी उपमहापौर भगवानराव वाघमारे यांच्या निवासस्थानी ओबीसी समाजाची महत्त्वपूर्ण बैठक पार पडली. या बैठकीस भगवानराव वाघमारे, स्वराजसिंह परिहार, कीर्तिकुमार बुरांडे यांच्यासह समाजातील आजी-माजी लोकप्रतिनिधी व अनेक नेते मंडळी उपस्थित होते. या बैठकीस प्रकाश शेंडगे यांनी मार्गदर्शन केले.

शेंडगे म्हणाले, गेल्या काही दिवसांपासून राज्यात ओबीसी प्रवर्गातून मराठा समाजाला आरक्षणाचा मुद्दा अधिक चर्चिला जात आहे. तर दुसरीकडे मनोज जरांगे - पाटील हे ओबीसीच्या समर्थनार्थ बोलणाऱ्यांवर आरोप करत आहेत. ओबीसीचे नेते मंत्री छगन भुजबळ (Chhagan Bhujbal) यांच्यावर त्यांनी आरोप करून त्यांना निवडणुकीत पाडण्याची भाषा करत आहेत. मग आम्ही सुद्धा शांत कसे राहू असा प्रश्न त्यांनी उपस्थित केला.

ते म्हणाले, मराठा समाजाला ओबीसी प्रवर्गातून आरक्षण देण्यास ओबीसी नेत्यांचा विरोध असल्याचे पुढे येत आहे. ओबीसी समाजाची बाजू मंत्री छगन भुजबळ लावून धरत असल्याने त्यांना लक्ष केले जात आहे. आगामी निवडणुकीत ते कसे निवडून येतात अशी भाषा वापरली जात आहे. त्यामुळे आम्ही ही शांत कसे बसणार.

तुम्ही एक भुजबळ पाडाल तर आम्ही त्यांचे 160 उमेदवार पाडू असा इशारा ही त्यांनी यावेळी दिला. मनोज जरांगे पाटील यांच्या पाठीमागे कुठली तरी राजकीय शक्ती उभी असल्याची शक्यता नाकारता येत नाही. पण, आगामी काळात निश्चित त्यांच्या मागे कोणाचा राजकीय वरदहस्त आहे हे पुढे आल्याशिवाय राहणार नाही असे ते म्हणाले.