मराठा आरक्षणासाठी तरूणाचं 15 दिवसांपासून उपोषण; प्रकृती खालावली, ICUमध्ये दाखल | Maratha Reservation

नांदेड : मराठा आरक्षणाचा वापर अनेकांनी राजकीय हत्यार म्हणून केला. सरकारे बदलली, आंदोलने झाले, उपोषणे झाले, मोर्चे झाले पण मराठा समाजाला अजूनही आरक्षण मिळू शकलं नाही. सुप्रीम कोर्टाने मराठा आरक्षण फेटाळल्यानंतर अजूनही हा तिढा सुटला नाही. पण मराठा समाजात आरक्षणासंदर्भात धग अजूनही कायम आहे.

नांदेड येथील दत्ता पाटील हडसणीकर हे मराठा आरक्षणासाठी आणि विविध मागण्यासाठी गेल्या १५ दिवसांपासून उपोषणाला बसले असून त्यांची प्रकृती सध्या गंभीर आहे.

नांदेड जिल्ह्यातील हदगाव तालुक्यातील हडसणी येथील दत्ता पाटील हडसणीकर हे 15 दिवसांपासून बेमुदत उपोषण करत आहेत. त्यामुळे त्यांची प्रकृती खालावली असून त्यांच्यावर नांदेडच्या विष्णुपुरीतील डॉ. शंकरराव चव्हाण रूग्णालयातील आयसीयू वॉर्डमध्ये उपचार सुरू आहेत. डॉक्टरांनी त्यांना उपोषण मागे घेण्याचा सल्ला दिला आहे पण ते त्यांच्या उपोषणावर ठाम आहेत.

यांच्या उपोषणाला अनेकांनी पाठिंबा दिला असून काही संघटनांनी त्यांना पाठिंब्याचे निवेदने दिले आहे. या उपोषणाचे पडसाद तालुक्यात उमटले असून हदगाव आणि हिमायतनगर तालुक्यातील व्यापाऱ्यांनी आपली दुकाने बंद ठेवत उपोषणास पाठिंबा दिला.

दरम्यान, माजी मुख्यमंत्री अशोक चव्हाण यांनी सोमवारी दुपारी हडसणीकर यांच्याशी फोनवर संपर्क साधला. विधीमंडळाच्या पावसाळी अधिवेशनात मराठा आरक्षणाचा प्रश्न आम्ही लावून धरणारच आहोत, त्यामुळे तुम्ही उपोषण सोडावे, अशी विनंती त्यांनी केली. तसेच हडसणीकर यांची प्रकृती खालावत असल्याने राज्य सरकारने तातडीने त्यांच्या आंदोलनाची दखल घेण्याची आवश्यकता असल्याचे चव्हाण यांनी म्हटले आहे.