Meri Maati Mera Desh: मोदींच्या संकल्पनेतील कार्यक्रमाला CM हजर पण दोन्ही उपमुख्यमंत्र्यांची दांडी; चर्चेला उधाण...

Meri Maati Mera Desh: पंतप्रधान नरेंद्र मोदी यांच्या संकल्पनेतील  माझी माती माझा देश (मेरी माटी मेरा देश) उपक्रमांतर्गत आयोजित अमृत कलश यात्रेत मुख्यमंत्री एकनाथ शिंदे यांनी हजेरी लावली. मात्र दोन्ही उपमुख्यमंत्र्यांनी या कार्यक्रमाला दांडी मारली. यामुळे राजकीय वर्तुळात चर्चेला उधाण आलं आहे.

गावागावातून माती कलश यात्रेत आणण्यात आले आहे. या यात्रेत सर्व लोक सहभागी झाले आहेत. आज स्पेशल ट्रेन दिल्लीला रवाना होईल. यामध्ये सर्व कलश दिल्लीला नेण्यात येतील. (Latest Marathi News)

ऑगस्ट क्रांती मैदानात आज अमृत कलश यात्रेचा भव्य कार्यक्रम आयोजित करण्यात आला होता. महाराष्ट्राचा विविध जिल्ह्यांतून संकलित केलेली माती अमृत वाटिकेसाठी आज दिल्लीला रवाना होणार. शेकडो स्वयंसेवक मातीचे कलश घेऊन दिल्लीला जाणार आहेत, अशी माहिती एकनाथ शिंदे यांनी दिली.

या कार्यक्रमात देवेंद्र फडणवीस व अजित पवार गैरहजर असल्यामुळे मोठी चर्चा झाली. कार्यक्रम पत्रिकेत नाव असताना फडणवीस कार्यक्रमास अनुपस्थित होते.

या कार्यक्रमात एकनाथ शिंदे म्हणाले, आज हा आपल्यासाठी ऐतिहासिक दिवस आहे. हे मैदान देखील ऐतिहासिक आहे.  चले जाओ चा नारा इकडे घुमला आणि ब्रिटिशांना भारत सोडावा लागला. आपल्या प्रणांची आहुती देणाऱ्या स्मृतींना मी अभिवादन करतो, असे एकनाथ शिंदे म्हणाले.