Vidhan sabha election 2024: MIM महाविकास आघाडीसोबत? इम्तियाज जलील यांच्याकडून 'या' २८ जागांसाठी पत्र

Maharashtra Assembly Election 2024: राज्य विधानसभेच्या निवडणुका तोंडावर आहेत. कोणत्याही क्षणी आचारसंहिता लागू शकते. त्यामुळेच विद्यमान सरकारने एकापाठोपाठ एक मंत्रिमंडळाच्या बैठका घेत मोठमोठे निर्णय घेतले आहेत. महाविकास आघाडीनेही पूर्ण ताकदीने शड्डू ठोकून निवडणुकीचं मैदान मारण्याची तयारी केली आहे.

महायुती आणि महाविकास आघाडीतील जागावाटपाबाबत बैठकांचं सत्र सुरु आहे. अद्याप कुणाचाही अंतिम फॉर्म्युला जाहीर झालेला नाही. महाविकास आघाडीमध्ये काँग्रेस आणि शिवसेना यांच्यामध्ये जागांवरुन रस्सीखेच सुरु असल्याची माहिती आहे. लोकसभा निवडणुकीतील यशानंतर काँग्रेसने आघाडीत आपल्या हक्काचा वाटा मागण्यास सुरुवात केली आहे.

दुसरीकडे एमआयएम हा पक्ष महाविकास आघाडीसोबत येण्यास इच्छूक असल्याचं दिसून येतंय. शिवाय पक्षाचे प्रदेशाध्यक्ष इम्तियाज जलील यांनी राज्यातल्या २८ जागांवर दावा केल्याची माहिती असून तेवढ्या जागा निवडून येतील, असा विश्वास व्यक्त केल्याचं बोललं जातंय.

एमआयएमच्या प्रदेशाध्यक्ष इम्तियाज जलील यांनी महाविकास आघाडीकडे 28 जागांसाठीचा प्रस्ताव दिल्याची चर्चा आहे. यापूर्वीही त्यांनी महाविकास आघाडीतील नेत्यांची माझी भेट झाली असं सांगितलं होतं. मात्र त्यावर महाविकास आघाडीतल्या कुण्याही नेत्याने उत्तर दिलं नव्हतं.

राज्यातील 28 विधानसभा मतदारसंघासाठीचा प्रस्ताव महाविकास आघाडीकडे दिले आहे. जिथे मुस्लिम मतदारांची संख्या जास्त आहे अशा राज्यातल्या 28 जागांवर एमआयएमला उमेदवारी द्यावी, असे लेखी पत्र दिल्याचे सांगितले जात आहे.

इम्तियाज जलील यांनी दावा केलेल्या जागांमध्ये सर्वाधिक जागा मुंबई आणि ठाण्यामधील आहेत. मुंबादेवी, धारावी, भायखळा, कलीना, चांदिवली, कुर्ला, वर्सोवा, अंधेरी पश्चिम, मानखुर्द, अणुशक्ती नगर, वांद्रे पूर्व आणि पश्चिम, भिवंडी पश्चिम आणि पूर्व, मुब्रा कळवा, संभाजीनगर मध्य, संभाजीनगर पूर्व, नांदेड उत्तर, नांदेड मध्य, पुणे कॅन्टोन्मेंट, सोलापूर मध्य, अमरावती, अकोला पश्चिम, वाशिम, अकोट, बाळापूर, मालेगाव, धुळे शहर या जागांचा प्रस्ताव एमआयएमने दिल्याची माहिती आहे.