MLA Disqualification Case : विधान परिषदेतील दोन शिवसेना आमदारांची अपात्रतेच्या धोक्यातून सुटका? जाणून घ्या कारण

शिवसेनेच्या आमदार अपात्रतेची सुनावणी सध्या विधानसभा अध्यक्षांसोमर सुरू आहे. या सुनावणीचा निकाल काय असणार याकडे सर्वांचे लक्ष लागले आहे. यादम्यान विधानपरिषदेतील दोन शिवसेना आमदारांची अपात्रतेचा धोक्यातून सुटका होण्याची शक्यता आहे.

विधानपरिषदेतील शिवसेना आमदार डॉ. मनीषा कायंदे आणि विप्लव बजोरिया यांचा आमदारकीचा कार्यकाळ पुढील काही महिन्यात संपणार आहे. तसेच अपात्रतेच्या याचिकांवरील सुनावणीबाबत अनिश्चितता असल्याने त्यांची अपात्रतेच्या धोक्यापासून सुटका होण्याची चिन्हे आहेत.

विधानपरिषद उपसभापती डॉ. नीलम गोऱ्हे, आमदार डॉ. मनीषा कायंदे व विप्लव बजोरिया यांनी मुख्यमंत्री एकनाथ शिंदे गटात प्रवेश केल्याने उद्धव ठाकरे गटाने त्यांच्याविरोधात अपात्रतेच्या याचिका सादर केल्या आहेत. विधानपरिषद सभापतीपद रिक्त असून डॉ. गोऱ्हे स्वत:च आपल्याविरोधातील याचिकेवर निर्णय देवू शकत नसल्याने त्यावर सुनावणी होणार नाही. तर डॉ. गोऱ्हे व अन्य दोन आमदारांविरूद्धही एकत्रित याचिका असल्याने आणि ठाकरे गटाला तिघांविरोधातील याचिकेवर सुनावणी हवी असल्याने ती प्रलंबित ठेवण्यात आली आहे.

तसेच विधानपरिषदेतील शिवसेना आमदार अपात्रता याचिकांवरील सुनावणीबाबत अनिश्चिता असून सभापतींची निवड झाल्यावरच ती होण्याची चिन्हे आहेत. मनीषा कायंदे यांचा आमदारकीचा कार्यकाळ 27 जुलै 2024 ला संपतोय. तर विप्लव बजोरिया यांचा आमदारकीचा कार्यकाळ 21 जून 2024 रोजी संपत आहे.