Shambhuraj Desai : 'अपात्रतेच्या सुनावणीत गडबड करू नका, शिंदे गटाच्या आमदारांना बाजू मांडण्याची संधी द्या'

सातारा : शिंदे गटातील (Shinde Group) आमदारांच्या अपात्रतेच्या सुनावणीत गडबड करू नये. आमदारांना आपली बाजू मांडण्यास पुरेशी संधी द्यावी. दोषी असले तर कारवाई करावी; पण आमचे आमदार दोषी नाहीत. त्यामुळे या प्रकरणात वेळकाढूपणा करण्याचा संबंधच नाही, असे स्पष्ट मत पालकमंत्री शंभूराज देसाई (Shambhuraj Desai) यांनी व्यक्त केले.

शिंदे गट शिवसेनेच्या आमदारांवर अपात्रतेच्या (MLA Disqualified) कारवाईत वेळकाढूपणा होत असल्याची टीका विरोधकांकडून होत आहे. या पार्श्वभूमीवर पालकमंत्री देसाई यांनी पत्रकारांशी बोलताना आपली भूमिका मांडली.

देसाई म्हणाले, ‘‘आमदारांच्या अपात्रतेची सुनावणी सध्या विधानसभा अध्यक्षांसमोर (Assembly Speaker) सुरू आहे. हासुद्धा न्यायालयीन प्रक्रियेचाच एक भाग आहे. आमच्या आमदारांनी म्हणणे मांडलेले आहे. सुनावणीस आमदार प्रत्यक्ष उपस्थित राहत आहेत. आम्ही तीन ते चार लाख लोकांतून निवडून आलेलो आहोत. एका सुनावणीत व तारखेत पुरेसे म्हणणे न ऐकता निर्णय झाला आणि तो आमच्या विरोधात गेला, तर आम्हाला आमचे म्हणणे पूर्णपणे व व्यवस्थित मांडायला दिले पाहिजे.

आमदारांनी यापूर्वी लेखी म्हणणे मांडले आहे. आणखी काही न्याय दाखले, निवाडे, जुने संदर्भ द्यायचे आहेत. त्यामुळे या सुनावणीत गडबड करू नये. आम्हाला पुरेशी संधी द्यावी. आम्ही दोषी असलो, तर कारवाई करावी; पण आम्ही दोषी नाही, हे आम्हाला माहिती आहे. त्यामुळे या प्रकरणात वेळकाढूपणा करण्याचा संबंधच नाही.’’

जरांगे पाटलांचे मानले आभार...

जरांगे पाटील यांनी मुख्यमंत्र्यांवर विश्‍वास दाखवला असून, एकनाथ शिंदेच मराठा समाजाला टिकणारे आरक्षण देणार असल्याचे कौतुक जरांगे पाटील यांनी केले आहे. यावर देसाई म्हणाले, ‘‘जरांगे पाटील यांनाही आता खात्री झाली आहे. धाडसाने निर्णय घेणारा मुख्यमंत्री शिंदे यांच्या रूपाने मिळाला आहे. टिकणारे आरक्षण तेच देतील, असा विश्‍वास त्यांनी काही लाखांच्या समोर व्यक्त केला आहे. त्यामुळे आम्ही जरांगे पाटलांचे आभार मानतो.’’