राज ठाकरेंना कोरोनाची लागण!

मुंबई : मनसे अध्यक्ष राज ठाकरे (raj thackeray) यांना कोरोना संसर्गाची लागण झाल्याची बातमी समोर येत आहे. गेल्या दोन दिवसांपासून राज ठाकरे यांची तब्येत बरी नव्हती. राज ठाकरे यांचा कोरोना रिपोर्ट पॉझिटिव्ह आल्याची माहिती मिळत आहे. मुंबई महापालिका अधिकाऱ्यांनी ही माहिती दिली आहे. तसेच राज ठाकरे यांच्या आईचा रिपोर्ट देखील पॉझिटिव्ह आल्याचे समजते.

मनसेचे मेळावे स्थगित

महापालिका निवडणुकीच्या पार्श्वभूमीवर मनसे अध्यक्ष राज ठाकरे चांगलेच सक्रिय झाले होते. मागील काही दिवसांपासून त्यांच्या नाशिक, पुणे या शहरांतील दौरे वाढले आहेत. 23 ऑक्टोबर रोजी भांडूपमध्ये मनसेचा मेळावा आयोजित करण्यात आला होता. हा मेळावा स्थगित करण्यात आला आहे. तसेच राज यांचा पुणे दौरादेखील पुढे ढकलण्यात आलाय. प्रकृती अस्वास्थ्यामुळे हा निर्णय घेण्यात आला होता. त्यानंतर आता राज यांना कोरोनाची लागण झाल्याचे समोर आले आहे.

कोरोनाच्या लाटेतही राज ठाकरेंनी मास्क वापरलेला नाहीमहापालिका निवडणुकांच्या पार्श्वभूमीवर सध्या राज ठाकरे सक्रिय झालेले आहेत. गेल्या काही काळात त्यांनी पुण्याला मोठ्या प्रमाणात दौरे केलेत. फक्त पुणेच नाही तर नाशिकचाही राज ठाकरेंनी दौरा केलेला आहे. बहुतांश ठिकाणी राज ठाकरेंनी मास्क वापरलेला नाही. विशेष म्हणजे संपूर्ण कोरोनाच्या लाटेतही राज ठाकरेंनी मास्क वापरलेला नाही.