'मी विदर्भात पुन्हा येईन' पण...; राज ठाकरेंचा कार्यकर्त्यांना कानमंत्र

नागपूर : मनसे अध्यक्ष राज ठाकरे यांच्या विदर्भ दौऱ्याचा आज पहिला दिवस असून त्यांनी आज नागपुरात आपल्या पदाधिकाऱ्यांची पहिली बैठक घेतली. येणाऱ्या निवडणुकीसाठी तयारीला लागण्याचे आदेश त्यांनी आपल्या कार्यकर्त्यांना दिले आहेत. ऑपरेशननंतर त्यांचा हा पहिलाच दौरा असून आगामी स्थानिक स्वराज्य संस्था निवडणुकीच्या पार्श्वभूमीवर राज ठाकरे विदर्भात आपल्या कार्यकर्त्यांसोबत बऱ्याच बैठका घेणार आहेत.

(MNS Chief Raj Thackeray Latest News)

"आगामी निवडणुकांसाठी स्थानिक पातळीवर पक्षाची मोर्चेबांधणी करा, मी लवकरच विदर्भात येईन पण तोपर्यंत पक्ष नीट बांधा, आपल्या पक्षात बदल निश्चित होणार असून पक्षात नवी उर्जा आणण्याचं काम आपल्याला करायचं आहे. आपण सगळे मिळून पक्षाच्या नवनिर्माणाचं काम करू, त्यासाठी तुम्हाला स्थानिक पातळीवर पक्ष बांधावा लागेल" अशा सूचना त्यांनी आपल्या कार्यकर्त्यांना दिल्या आहेत.

"स्थानिक पातळीवरील शाखेमधून पक्षसंघटना मजबूत करण्याचे आदेश राज साहेबांनी दिले. त्यानंतर आपला पक्ष वाढणार असून मी पुन्हा विदर्भात येईल असं त्यांनी सांगितलं पण संघटना जास्तीत जास्त वाढली पाहिजे अशी साहेबांची इच्छा आहे" अशी माहिती मनसेच्या महिला पदाधिकाऱ्यांनी दिली आहे.

दरम्यान, स्थानिक स्वराज्य संस्थेच्या आगामी निवडणुकीसाठी मनसे मैदानात उतरली असून स्वतंत्र लढण्याची घोषणा मनसेने केली आहे. विदर्भ दौऱ्यात पक्षसंघटना बळकट करण्याचा मनसेचा प्रयत्न असून त्यानुसार कार्यकर्त्यांना सूचना देण्यात येत आहेत. त्यांच्यासोबत मनसेचे मुंबईतील पदाधिकारीही आहेत.

भाजपसोबत युती नाही

मशिदीवरील भोंग्याच्या प्रकरणानंतर मनसे भाजपसोबत युती करणार असल्याच्या चर्चा होत्या. त्यानंतर भाजप हा कामापुरता मित्र आहे, त्यामुळे त्यांच्यासोबत युती करणार नाही अशी माहिती मनसेचे अविनाश जाधव यांनी दिली होती. त्यामुळे आगामी निवडणुका मनसे स्वबळावर लढणार असल्याचं चित्र स्पष्ट आहे.